Янъыларда Дагестан Республикасынынъ Халк Йыйынынынъ кезекли сессиясында ДР Конституциясына туьзетуьвлер киргистуьв акында закон проекти экинши окылувында кабыл этилинди. Сонынъ акында оьзининъ ойы ман «Единая Россия» Савлайроссиялык политикалык партиясынынъ Ногай ерли боьлигининъ толтырувшы секретари Амирхан Межитов боьлискен.
– Дагестан Республикасынынъ Халк Йыйынынынъ кезекли сессиясында Дагестан Конституциясына туьзетуьвлер киргистуьв акында кабыл этилинген закон проекти республика ямагаты арасында бир неше куьнлер юритилген эрислесуьвлерди токтатты деп ойлайман. Сонынъ алдында коьп ягыннан политикалык маьнеси болган кышкырыклар эситилип турдылар, законга таянып айтылган ойлар аз эдилер. Соны ман байланыста болар, ызында Дагестан Аькимбасы Сергей Меликовтынъ оьзине юрист анълатувларын этпеге туьсти. Кайтип айтсак та, дагестан ямагатында дурыс акыл енъди деп ойлайман эм республика парламенти туьзетуьвлерди кабыл этти. Эндигиси конституционлык нормалары дагестан халкы уьшин иркилмей ислер деп сенемиз, – деген Амирхан Межитов газетамыздынъ хабаршысына.