«Шоьл тавысы» республикалык газетасынынъ эксперти, «Единая Россия» ВВП Ногай ерли боьлигининъ толтырувшы секретари, РФ Орыс географиялык ямагатынынъ Ногай боьлигининъ секретари Амирхан Межитов Россия Президенти Владимир Путиннинъ Язбасы акында оьз ойын айтады.
– Элимиздинъ Президенти Владимир Путиннинъ Язбасы аьдетке коьре яшав яктан коьп маьнели соравларды коьтереди, солардынъ уьстинде бизге аьли де ойласпага эм солардынъ терен маьнесин анъламага амал болар деп анълайман.
Болса да, аьли де биринши ой-сезимлерге коьре, Язбадынъ коьп тезислерининъ туьп маьнеси Путиннинъ соьзинде орын тапкан тапшырмаларды толтырув аьсеринде ашыкланаяк. Патшалыгымыздынъ басшысынынъ айтувы ман, туврадан-тувра бизим элимиздинъ келеектегисин белгилейтаган тапшырмаларды. Сол тапшырмалар тек власть органларына каратылмаган. Путин «бизим аьр биримиз айлак та уьйкен яваплылыкты тутамыз» деген баслапкы соьзи мен ок баьримизге де шакырув этти. Элимиз уьшин, бизим келеектегимиз уьшин яваплылык тутпага.
Тувган Элди коршалав бойынша борышларды толтыратаган, дурысында, янъы заманга келисли россия армиясын кеплендиретаган аьскершилердинъ каьрлерин шегуьв акында соьзи мен Язбасын баслап, эл етекшиси бизим баьримизди де янъы ямагатты туьзуьвге коьнъиллендиреди. Владимир Путин эки акылды тутпай, Язбасында белгиленген баьри борышларды шешуьвге тек сол заман йол ашылар, эгер биз тонавшылык эм колонизация аркасы ман келим этуьв йорыгына негизленген экономикадынъ куьнбатар моделиннен эншимизди алсак дегенди анълатады. Онынъ тезислерининъ бу кесегинде бек маьнели эм терен акыл бар. Финанслык, интеллектуальлик, технологиялык эм баска коьп туьрли байыр амаллар ресурсларынынъ булакларына таянып, ол экономикадынъ капиталистлик рынок модели бизге йол белгиси болып болмайды деп тувра эм ашык кепте белгилеп айтты.
Сол себептен, эндигиси Россия яхшылык эм дурыслык принциплерине таянган оьз элининъ кызыксынувларын яклайтаган янъы ямагат туьзбеге болаяк деп йигерли кепте уьмит этпеге болады. Тек сол заман Россиядынъ йогары билимлендируьв тармагын аьдетли россиялык негизлерине коьшируьв борышларын шешпеге амал табылаяк. Солай болганда, Куьнбатар бизге алдынгы йылларда ябыстырган йогары билимлендируьвдинъ Болон тармагы яшавдан тайдырылар деп сенмеге боламыз. Соьйте келе шерет орта билимлендируьв тармагына да етер деген сеним бар, неге десе шакырувлар заманлары тайып, сенимлер заманлары басланып туры, – деген Амирхан Межитов.
