Бу куьнлерде Савытлы куьшлерге уьйкен маьне бериледи. Россия Федерациясында кайсы заманларда да куватлы аьскер болган эм бар. Аьлиги заманларда аьр бир эр кисидинъ элин коршалавга шыкканы бек пайдалы эм контрактлы ис аьрекет бардырувы боьтен де хош коьриледи.
Контракт бойынша Россия Федерациясынынъ Савытлы куьшлер сырасында куллык этетаган ясларымыздынъ бириси Арсен Мурат увылы Толубаев болады. Арсеннинъ балалыгы эм яслыгы Дагестан Республикасынынъ Ногай шоьллигинде оьткен. Оьткен йылдынъ язында Арсен аьскер сырасына алынды. Ога сол аьрекет Юградынъ куьнбатар – сибирь туьзликлеринде басланды.
Контракт бойынша эли алдында эр борышын толтырувды бардырув – аьскершидинъ алдында коьп мырсатларды ашады. Айтпага, онынъ патшалыктан алатаган белгиленген кыйын акы, туьрли согыс операцияларында катнаспага болатаган ыхтыяры, солай ок, Россия Федерациясынынъ япсарларында тынышлыкты яклав эм коршалав болады. Солай болганда, эр кисидинъ йигерлиги де беркийди эм ол оьзи де Эл алдында яваплылыкты сезеди.
– Арсен меним ялгыз аявлы увылым болса да, мен оны тийисли кепте, аталарымыздынъ аьдетлери бойынша шынты патриотлык сезимлер негизинде тербияламага шалысканман. Ога энъ де маьнелиси, бу яшавда – Тувган ерди, Аталыкты коршалав.
Оьзек те, балады каты урыслар болатаган, согыс спецоперациясы юретаган ерлерге йиберуьв енъил тувыл. Кешелерде уйкым да боьлинеди, навам да йойылады, ама амал йок, сол меним увылымнынъ сайлаган йолы, буйырган кысмети. Согыс спецоперациясында Арсен яраланган куьни де болды, – дейди Арсеннинъ анасы Рысбике Казманбетовна Толубаева.
Арсен Терекли-Мектеб авылынынъ А.Ш.Джанибеков атындагы орта мектебин окып кутарганнан сонъ, Махачкаладагы правовой академиясындагы Дагестан патшалык колледжининъ юридический боьлигине окымага туьседи. Ол мектеб йылларында йолдаслары, окытувшылары араларында сыйды оьзининъ алаллыгы ман казанган окувшы эди. Сонынъ акында бизи мен онынъ класс етекшиси Карина Рашидовна боьлисти:
– Арсен окув йылларында оьзин ийги яктан коьрсетип келди. Оны ман хабарламага бек енъил. Ол катнаска тез кирисетаган аьдем болады, тапшырылган борышты бир де ерине еткермей калдырмаган. Арсен биревдинъ аркасы ман алдына салынган мырадына етисетаганлардан тувыл, онынъ шынты патриотлык сезимлери сол йылларда белгили эди. Мен онынъ эли алдында борышын толтырмай калар деп бир де ойламаганман. Сенимлерим окувшыларыма айлак уьйкен эди, аьли мен олар уьшин бек оьктеммен, – дейди ол.
Оьзек те, окытувшы да анадан кем ойламайды оьзининъ окувшылары акында. Саргайып баратаган (алдынгы заманларда), аьли электронлы кепте сакланатаган суьвретлерде коьп йыллар артта окыткан окувшылардынъ юзлерине каралады. Аьр бир суьврет – эстелик, соларды Карина Рашидовна да арада актарады, аьр бир окувшысына тек наьсипти, савлыкты йорайды…
Арсен бу куьнлерде Россия Федерациясынынъ япсарларын украиншы нацистлерден коршалавда катнасады. Бу куьнлерде Россия Федерациясынынъ аьскершилерине бек сенемиз. Олар Элге енъуьвди аькелерлер эм юртка аман-эсен кайтарлар, аналардынъ уьмитлери толар.
Галима Курганова.
Суьвретте: Арсен Толубаев (экинши сыдырада солдан онъга экинши).
