Ногай районынынъ сыйлы яшавшылары, организациялар етекшилери!

Ана тилимизде шыгатаган «Шоьл тавысы» республикалык газетасына 2020-ншы йылдынъ экинши ярым йылына язылув шагы басланды.

Оькинишке, газетага язылув кампаниясы энъ авыр, яшавшылар эпидемиологиялык аьли мен байланыста карантинде болган заманга келди. Ама сол ок заманда газетамыздынъ редакциясы да эм Ногай районындагы Россия Почтасы да оьз аьрекетин токтатпай юритип келедилер.

Газетамыз дайым халк сезимине таянып келген. Ногай халкы ямагатка, маданиятка, тарихке, спортка каратылган макалалары шыгып эм баспаланып келетаган суьйикли газетасынынъ бетлеринде дайым оьз тиревин тавып келген. Олар халктынъ куьндегилик маьселелери, Ногай районынынъ экологиясынынъ аьли, халкымыздынъ арасындагы белгили аьдемлери, айтпага, шаирлери, язувшылары, окытувшылары, врачлары, авыл хозяйстволык куллыкшылары, ветеринарлары, районнынъ газ-электроканагатлав тармагынынъ куллыкшылары, артистлери акында боладылар. Бир соьз бен айтканда, «Шоьл тавысы» газетасы – ол халк газетасы болады.

Буьгуьнлерде «Шоьл тавысы» республикалык газетасынынъ редакциясы савлайынъызды да 2020-ншы йылдынъ экинши ярым йылына язылганынъызга, солай болып ана тилимизде шыгатаган ялгыз газетасына демевлик эткенинъизге тилек салады.

Газетамыздынъ экинши ярым йылына Ногай районындагы Россия Почта боьлигиннен (индекс 51365) язылувынынъ баасы – 258 маьнет 06 каьпик, редакциядан – 150 маьнет болады.