Тотальный диктант «ногайша»______________

Календарь бойынша халклар ара ана тиллер куьнининъ белгиленуьви ишинде ерли китапханасында тотальный диктант «ногайша» озгарылды. Бу шара бизим Ногай районымызда аьдетке кирип, экинши йыл озгарылды. Шарада 30-га ювык аьдемлер катнастылар. Катнасканлардынъ яслары да, ислейтаган ис орынлары да баска эди. Шара бир неше онйыллыклар артта мектебтен билим алып шыккан аьдемлерге бек кызыклы эди. Бу шара бизди кайтадан балалыкка, яслыкка кайтарды, оьзимизди бир мектебтедей сездик.

Бу йыл диктант ногай адабиатынынъ уллы йыравларынынъ бириси Шал-Кийиз Тиленши увылынынъ 600 йыллык мерекесине багысланган эди. Диктантты Кадрия атындагы мектебининъ ана тилден окытувшысы Мархаба Базарбай кызы Мансурова бек анъламлы аьлде окып, яздырды. Сондай яваплы ис басланганша китапхана куллыкшылары йыйылганларга:

– Сиз буьгуьн диктантты кайдай ниет пен язбага келдинъиз? – деген соравды бермей болмадылар. Сорав берилген аьдемлердинъ баьриси де бир тавыс пан: «Бизди буьгуьн мунда ана тилимизге суьйим аькелди, оьз билимимизди тергейик», – деп те келдик деп явапладылар.

Шара бек кызыклы эди. Барган аьдемлер, сол санда мен де, уьйкен оьктемлик пен кайттык.

Диктанттан сонъ белгилер суьйингендей тувыл. Сонынъ сырагыларына коьре тилимизди коьбиси билмейтаганы коьринди. Тек атайларымыздан калган ийги соьз бар: «Тама-тама коьл болар», сога коьре йыл сайын бу шара озгарылып турса, бизим тилимизге де суьйимимиз оьсер эм билимимиз де кенъеер. Халклар ара ана тилдинъ белгиленуьви ишинде диктанттан баска болып авыл ерлериндеги китапханаларда «Шебер тувган тилим» (Уьйсалган авылында), «Баьри куьшти салайык» (Нариман авылында), «Алтын булак – ана тил» (Кумлы авылында) озгарылдылар.

Г.Курганова.
Суьвретте: ногай тилинде тотальный диктант озган шак.