Газетамызда конъысы Шешен Республикасынынъ Шелковской районынынъ Сары-Су авыл орта мектебининъ окувшысы, яс боксер Арсен Мустафаевтинъ уьстинликлери акында бир неше кере билдирилген эди. Ол ызгы эки йылдан бери бас деп оьз мектебинде, сонъ район эм республика дережелеринде озатаган ярысларда бир енъуьвден экиншисине сенимли кепте абытлап барады. Быйыл март айында ол Сырт-Кавказ федераллык округы бойынша рейтинг ийги спортсменлер сырасына киргистилди. Тек янъыларда бу кайратлы ногай ясымыз 11-18-нши май айында оьткен 42 килограмм шекки категориясында 14-15 ясларындагы кеделер арасында Россия чемпионатында катнаскан эм элимиздинъ чемпионы деген йогары атты казанган.

Соны ман Арсен эндигиси тайский бокс бойынша юниорлар арасында оьтеек дуныя чемпионатында катнасувга йол кагытын алган.
Арсен Мустафаев аьли де яс, ол 9-ншы класста окыйды. Талаплы эм йигерли ногай ясымыз бан биз уьйкен сенимлеримизди байланыстырамыз эм ога ден савлык, эмишлик, уьйкен спорт етимислерди йораймыз. Тилден-коьзден сени Алла оьзи сакласын, алдыдагы йолынъды онъласын, Арсен!
М.Ханов.
Суьвретте: Арсен Мустафаев (ортада, 1-нши орын басамагында).