– деп айтылган ийги соьзлер несилден-несилге берилип, армаганнан келеди. Акыйкатлыгы да бар, тийислисиннен артык билими болган эм оьзининъ де алдына салган мыратлары бар болса, уьстинликке етисуьв айлак кыйын тувыл. Аьлиги заманда уьстинликлерге етисетаган ясларымыздынъ саны куьннен-куьнге оьсип барады, соьйтип, ногай миллетли аьдемлерди де эл бойынша танып басладылар. Аьлимлеримиз де, язувшыларымыз да, шаирлеримиз де буьгуьнлерде айлак коьп болмаса да, бар. Олардынъ алдыларында да мырсатлар коьп, туьрли шараларда катнасып, оьз китаплерин шыгарадылар, баска тиллерге коьширилмеге де амаллар бериледилер.
Бизди боьтен де суьйинтетаганы – ясларымыздынъ уьстинликлери. Янъыларда, тувралап айтканда, карагыс айынынъ 14-нши куьнинде Россия Федерациясынынъ Президентиндеги Дагестан Республикасынынъ Дайымлык ваькиллигинде Россиядынъ бас каласы Москвада окыйтаган дагестанлы йогары билимли студентлери мен йолыгыс озгарылды. Сол йолыгыстынъ бас мырады – Дагестан Республикасынынъ Аькимбасынынъ стипендиаты деген атты тапшырув. Бу сыйлы атка Москва каласында окыйтаган оьзлерининъ терен билимлерин коьрсететаган эм ямагат яшавында белсен катнасатаган ясларымыз тийисли болдылар, кыскаша айтканда, ийгилердинъ сайламлары. Сол сайланган яслар ишинде, Дагестан Республикасынынъ Аькимбасынынъ стипендиаты деген атка Терекли-Мектеб авылында тувып-оьскен, 2016-ншы йылда А-Х. Джанибеков атындагы мектебин алтын медали мен окып тамамлаган Эмилия Али кызы Баймурзаева да тийисли болды.
Эмилия мектеб йылларында да бек билимли, мектеб яшавында да белсен катнасатаган кыз эди. Ол оьзининъ мектебте алган билимин теренлетер ниет пен куьн сайын ислеп турды, оьз билимин оьстируьв инсанга пайдасын бермесе, оькинишке еткергени йок. Мектебтен сонъ, ол медициналык куллыкшысынынъ кесписин сайлап, Россия Федерациясынынъ савлык саклав министерствосынынъ Н.Пирогов атындагы Россиядынъ миллет тергев медициналык университетине окымага туьсти. Бу куьнлерде оьзининъ йогары етимислери мен Эмилия сол окув ошагынынъ педиатрия факультетининъ 6-ншы курсынынъ студенти болады. Сондай ийги оьзгериске багысланган шарады кесек заманга Россия Федерациясынынъ Президентиндеги Дагестан Республикасынынъ Дайымлык ваькилининъ исин юритуьвшиси Владислав Толстюк ашты эм юритти.
– Бу куьнлерде Москва каласында Дагестан Республикасыннан доьрт мынънан артык студентлер окыйдылар, солардынъ ишиннен 22 студент бу атты юритпеге тийисли болды, сога коьре, сиз ийгилердинъ ийгилери боласыз. Тербиялы, уьстинликлерге етисип болатаган, баьри яктан да оьнерли ясларымыз – бизим ярык келеектегимиз. Бу куьнлерде бизим республикамызга билимли яслар бек керек, сизинъ бетлеринъизде биз келеекте министрлеримизди, аьлимлеримизди коьремиз. Етискен уьстинликлеринъиз бен токтаманъыз, тек алдыга абытларынъызди йигерли алынъыз. Сиз бизим республикамызга кеспили специалистлер болып келеегинъизге бек сенемиз, – деди В.Толстюк.
Сыйлы баргылы савгады студентлерге Кутафин атындагы Москвадагы патшалык юридический академиясынынъ доценти Эльмира Атагимова тапшырды. Оьктемсиймиз биз сол санда ердесимиз Эмилия Баймурзаева болганына эм алдыда ога тек уьстинликлерди йораймыз.
Г.Сагиндикова.
Суьвретте: Э.Баймурзаева олтырганлар ишинде онънан доьртинши.