Аьлиги заманнынъ окувшыларынынъ алдыларында –уьйкен йол, оларда кайдай да мырсатлар бар. Алдынгы заманлар ман тенълестирип карайык: аьли Интернет тармагы коьп ерлерде коьмекши болады, алдынгы окувшы тек оьзининъ окытувшысынынъ берген билимин алады, оьзининъ де айлак куьшли ымтылысы болса, китапханадан шыкпай, сонда бар китаплерди актарады. Оьзек те, артык билим биревге де, бир заманларда да буршав бермеген. Сога коьре, билимли аьдемнинъ кайсы заманларда да сыйы болган эм аьли де болаягына шек йок. Ызгы заманларда ясларымыздынъ ийги атларын аз эситпеймиз. Айтпага, барган базласлардан ногай йигитлеримиз болсын, кызларымыз болсын, савгалы орынды алмай кайтпайдылар. Сол тувыл ма бизге уьйкен куьез.
Янъыларда «Талаплы балалар орталыгы» республикалык лицей- интернатында «Фибоначчи» деп аталган эсап сабагы бойынша олимпиада озгарылды. Бу олимпиададынъ озгарылувынынъ бас ниети эм борышлары: яратувшылык амаллары бар окувшыларды эртеректен ашыклав эм оьрлендируьв, илми-тергев аьрекети мен кызыксындырув эм савлайроссиялык дережесинде дагестан окувшыларынынъ билимин коьрсетуьв.
Дагестан Республикасы бойынша айтылган эсап сабагы бойынша олимпиада да катнаспага 500 окувшы аьризе берген эди, солардынъ 450-си ортакшылык эттилер. Сол санда Ногай районынынъ Червленные Буруны авылынынъ З.Акмурзаев атындагы орта мектебининъ 4-нши «а» класс окувшысы Аслан Байрамбаев те бар эди.
Аслан, онынъ окытувшысы Гульмира Алимсултан кызы Гапаровадынъ белгилевине коьре, мектебке келгеннен алып, оьзининъ терен билимин, узактан ойлап болувын коьрсетип келди. Онынъ эсап дерисине ымтылысы, кызыксынувы айлак уьйкен. Бу куьнлерде ол– савгалы орынга тийисли болган окувшы.
– Оьзек те, авыл еринде тувып-оьсетаган баладынъ сондай дережели орынга етисуьви – бизге айлак уьйкен етимис эм оьктемлик, биз, окытувшылар, сондай билимли балаларды оьрлендируьв уьстинде ислеймиз эм алдыда да колымыздан келген коьмеклеримизди этеекпиз, – дейди Гульмира Алимсултановна.
Эсап дерисин терен билген Асланга алдыда тек йогары уьстинликлерди йораймыз, атынъ сенинъ дайым енъуьв пьедесталынынъ биринши орынында болсын.
Г.Сагиндикова.
Суьвретте: А.Байрамбаев.
