Коькек айдынъ ишинде Дагестан патшалык университетинде XVIII-XIX оьмирлердинъ эм XX юзйыллыктынъ басындагы «Дагестан шаирлигининъ антологиясы» деген йыйынтыктынъ презентациясы болып озды. Бу китап дагестан халкларынынъ адабиатын излестируьв Орталыгы ман баспаланган.

Шарады ДГУ ректоры Муртазали Рабаданов ашты. Ол авторларды китаптинъ баспаланувы ман кутлады, сондай шыгармалар бизим маданиятымыздынъ оьрленуьвине бек маьнели экенин белгиледи. Солай ок презентация барысында ДГУ филология факультетининъ деканы Шабан Мазанаев, миллет политика боьлигининъ етекшиси Александр Гаджиев соьйледилер. Айырым соьзди дагестан халкларынынъ адабиатын излестируьв Орталыгынынъ директоры Хадижат Алиева алды.
– Антологиядынъ ишине XVIII-XIX оьмирлердинъ эм XX юзйыллыктынъ басындагы дагестан шаирлигининъ ваькиллерининъ ятлавлары, дестанлары кирген. Бу шыгармаларга орыс тилине сыдыралы коьшируьвлери, биографиялык билдируьвлери берилген. Бу китап окытувшыларга, студентлерге, окувшыларга, излестируьвшилерге бек пайдалы болаяк, солай ок сыдыралы коьшируьвлерди шаирлер художестволык коьшируьвлер этпеге де кулланмага боладылар, – деп айтты Х.Алиева.
Китаптинъ баспаланувы акында оьз соьзлерин коьшируьвшилер, шаирлер айттылар. Олардынъ кайбириси китаптинъ кайдай уьйкен маьнеси эм баасы бар экенин белгиледилер. Йыйылганлар келеекте сондай шыгармалар баспаланувын планга киргистпеге кереги акында айттылар.
Антологияга белгиленген заманнынъ ногай шаирлери кирдилер – Саркынбай Крымлы, Элбурган Найман увылы, Фахруддин Абушахман увылы эм сондай баскалар. Антологиядынъ туьзуьвшилерининъ сырасында ногай шаири Гульфира Бекмуратова да бар.
Адабиат – халктынъ анъ байлыгынынъ коьрсетуьвшиси, сога коьре оьз халкынынъ, оьз Аталыгынынъ адабиаты ман кызыксынув – бек маьнели.
Бизим хабаршы.