Аьр бир ногай аьдемнинъ оьз баласына онынъ тили, кайсы тамырдан, тукымнан шыкканын, ата-бабаларын, халк аьдетлерин, ойынларын, халкынынъ тарихин билмеге уьйретуьв алдында уьйкен борыш болады. Буьгуьнлерде ногай халкымыздынъ коьплеген яс аьеллери элимиздинъ туьрли муьйислеринде турып, яшав суьрип келедилер. Элбетте, ол зат яслардынъ экономика ягыннан яшав турмысын ийгилендируьв мен байланыста бек ийги абыт болады, ама ясларымыз, балаларымыз тувган ериннен узак болувы ман, ана тилиннен де алыс бола беруьви, баска миллетлер арасында турып, ана тилин мутпага болатаганы бек оьзелендиреди.

Эгер кайсымыз да не ерде болсак та, ана тилимизде соьйлеп, тилимизге уьйкен сый, эс этсек, онынъ йойылып барувынынъ алдын шалаякпыз. Норильск каласындагы Ногай миллет-культуралык автономиясынынъ ерли боьлиги мен ызгы йыллар ногай маданиятын оьрлендируьв бойынша айырым куллыклар этиледи. Калада яшайтаган туьрли ерлерден кайбир патриот ногайларымыз кала, кырал бойынша озгарылатаган шараларда катнасувы ман, баска халкларды оьз маданияты ман, санияты ман таныстырып келедилер. Янъыларда алыс Норильск кала орталыгыннан 25 шакырым ерде орынласкан Красноярск крайынынъ Талнах каласында да ийги оьзгерис болды – ол ногай балаларына ана тилин уьйренмеге амал берди. Норильск каласындагы Ногай миллет-культуралык автономиясынынъ ерли боьлигининъ етекшиси Кумукбий Ибрагимовтынъ эм онынъ агзаларынынъ уйгынлавы ман бу йылдынъ канътар айынынъ 26-ншы куьниннен алып «Земляничка» деген балалар бавынынъ тербиялавшылары, Норильск каласындагы Ногай миллет-культуралык автономиясынынъ агзалары, Норильск каласында оьтетаган туьрли шараларынынъ белсенли катнасувшылары, патриот ердеслеримиз Магира Мамурова (Абдулбариева), Айгуль Аджекова ана тилин юмада эки кере юритип басладылар.
Ана тилининъ эм адабиатынынъ дериси юритилип баславы тувган ериннен алыс ерде ногай тилимиз мутылмасын деген асыл мырат пан этилинген эди. Сол ак ниетли исти Талнах каласында яшайтаган ногай миллетли ата-аналар хош коьрип алдылар эм буьгуьнлерде 10 ногай балалар юмада эки кайта келип, оьз тувган тилинде бир-бириси мен соьйлеп, язып, окып, туьрли затларга уьйренип басладылар.
Келеекте де сол басланган ийги ис ногайлар туратаган баска калаларда да оьрленип барып, ана тилине ымтылган балалардынъ саны оьсип, алыс якта ногай тилимизди баалап билген патриотларымыз коьп болаягына сеним этемиз.
Г.Нурдинова.
Суьвретте: Магира Мамуровадынъ ана тилиннен дерис юритуьв мезгили.