Бизим заманнынъ баьтирлери – согыс спецоперациясынынъ катнасувшылары Уллы Аталык согысынынъ ветеранларынынъ йигитликлери негизинде тербияланганлар. Бизим атайларымыз, оьзлерининъ канын-янын аямай, нацизм мен куьрес юриткенлер. Сол кайгылы куьнлерден 80 йыл оьткеннен сонъ да, бу куьнлерде Россиядынъ увыллары оьз аталарынынъ исин бардырадылар. Кайсы заманларда да Россиядынъ йигерли йигитлери душпаннан оьз Аталыгын коршалавда эрклик коьрсеткенлер. Олар куьллелер астыннан алдыга карап шапканлар, янаяткан самолетларын явга каратканлар, разведкага барганлар, командованиединъ туьрли борышларын толтырганлар, оьз яшавын сынавга салып, йолдасларын эм командирлерин оьлимнен куткарганлар. Эткен йигитликлери уьшин коьп аьскершилер эм офицерлер туьрли орденлер эм медальлер мен савгаланганлар, Совет Союзынынъ эм Россия Баьтирлери болганлар. Йок, бу йигитликлерди олар данък уьшин тувыл, ер юзинде яшав уьшин эткенлер. Бек оьктемли Аталык коршалавшысын тербиялав, ама эки кайта оьктемсийди ата-аналар кимнинъ увыллары Аталыгын коршалавда, онынъ бойсынмаслыгы эм бузылмаслыгы уьшин куьресте йигитликлер этип савгаланса.
Оьз увыллары ман Нариман авыл яшавшылары Бегали эм Гульфира Абдулбариевлер оьктемсийдилер. Ислам эм Руслан Абдулбариевлер согыс спецоперациясында озган йылдынъ казан айыннан алып катнасадылар. Олар СВО озып турган ерге барган сонъ, бир де уьйлерине тыншаювга келген йоклар. Тек олардынъ сийрек эм кыска занъ согувлары – ювыкларына уьйкен наьсип. Янъыларда ийги хабар келди – Ислам эм Руслан Святой Георгийдинъ ордени мен – IV дережели Георгиевский крести мен савгаланганлар. Ата-анасы кайдай борыш толтырганлары уьшин олар савгаланганын билмейдилер. Яс йигитлер, ол ис аьскершилик сыр дейдилер. Олардынъ ата-анасы тек Святой Георгий ордени – Георгиевский крест аьскершилер, матрослар, сержантлар эм старшиналар, прапорщиклер и мичмантлар сырасыннан аьскер аьрекетшилерине Аталыкты коршалавда урысларда коьрсеткен йигитликлери эм халклар ара тынышлык эм кавыфсызлык кайтадан туьзуьвде яде саклавда баска патшалыклардынъ еринде урысларда баьтирликлери уьшин, согыс усталыгынынъ, эркликтинъ уьлгиси болганы уьшин тапшырылатаганын биледилер. Сол орденди байыр йигитлик – керекли билдируьв эткен явды есирге, душпаннынъ байрагын алганы уьшин, солай ок командирдинъ яшавын куткарганы яде баска сондай ис уьшин бериледи. Сондай йигитликлердинъ бирисин бизим ердеслеримиз Ислам эм Руслан Абдулбариевлер коьрсеткенлер.
Н.Кожаева.
Суьвретте: Ислам эм Руслан Абдулбариевлер.