Кайзаманда да аьдемлер оьз Эли мен оьктемсип, оны душпаннан коршалап келгенлер. Патриотизм, тувган Элинъе кызмет этуьв, коркынышсызлык дайым халкымыздынъ бас баалыклары болган эм буьгуьнлерде де бос соьзлер болып калмайдылар. Элимиздинъ бойсынмаслыгы уьшин куьресип келген баьтирлеримиздинъ йигитликлерин биз эсимизде аявлап саклаймыз. Буьгуьнлерде ясларымыз алдышылыкта, яс янларын кызганмай, кир ниетли нацизмнен Аталыгын коршалап, тувган Элимиздинъ ярык келеектегиси уьшин аьдиллик, дурыслык уьшин куьрес юритедилер. Олардынъ аьр бириси бизге йигерликтинъ, йигитликтинъ уьлгиси болып келеди. Элге авыр заманлар тувганда, оны коршалавга шыгув – ол аьр бир эр аьдемнинъ асыл борышы. Биз алдышылыкта болган ясларымызды атлары ман билмеге тийислимиз. Йыллар, онйыллыклар оьтсе де, яс несиллеримиз бизим заманнынъ баьтирлери акында эслеринде тутпага тийислилер, неге десе олар бизим келеектегимиз уьшин Украина еринде оьтетаган согыс спецоперациядынъ бек маьнели борышларын шешип, Аталыгымыздынъ бойсынмаслыгы уьшин, яс яшавларын аямай, куьрес юритедилер.
Червленные Буруны авылынынъ яшавшысы, тамада сержанты Ислам Бегали увылы Абдулбариев бизим тынышлы парахатлыгымыз уьшин нацистлерди каты урып келеди. Ислам Бегали увылы Ногай районынынъ Червленные Буруны авылында 1987-нши йылдынъ карагыс айынынъ 18-нши куьнинде тувган. Ерли мектебте билим алганнан сонъ, ясты Аьскер сырасына шакырадылар. Ислам Абдулбариев эр борышын Вологда каласынынъ радиация, химия эм биологиялык коршалав бойынша аьскер боьлигинде етимисли оьткен. 2014-нши йылдан алып Ислам службасын Шешен Республикасында контракт бойынша уьстинликли бардырады. Онда ногай яс коьлик айдав бойынша инструкторы аьрекетин толтырды. Ислам Бегали увылы Сырт Кавказда согыс оьзгерислерининъ катнасувшысы болады. Ийги, яваплы иси уьшин «За отличия в службе» деген коькирек белгиси мен де савгаланган. Баска болып, онынъ службасындагы етимислери мерекели медальлери мен де белгиленген. Ердесимиз 2022-нши йылдынъ увыт айыннан алып Донецк областинде согыс спецоперациясында ортакшылык этип келеди. Бу куьнлерде тамада сержанты Ислам Абдулбариев оьз кызметин Урал коьлигининъ айдавшысы болып толтырады. Ол биринши куьнлериннен алып алдына салынган борышын намыслы толтырмага шалысады. Енъуьвди ювыклатувда оьз уьлисин косып келеди.
Янъыларда тамада сержанты Ислам Бегали увылы согыс спецоперациясы барысында кызметинде эм согыс бойынша борышларын толтырувда коьрсеткен баславлары, каныгыслыгы, баскаланувы уьшин аьскер боьлик етекшилевининъ Сый грамотасына тийисли этилген.
Оьткен йылдынъ навруз айында, службада коьрсеткен етимислери уьшин, III дережели «За отличие в службе» медали мен де савгаланган.
Ол куьн сайын Енъуьвдинъ исине оьз косымын этип келеди. Тувган еринде аьскерши ясымыздынъ аман эсен уьйине кайтканын онынъ суьйикли анасы Рыслыхан, аьели, аьвлетлери, кардаш-тувганлары аьсиретли куьтедилер.
Биз де согыс спецоперациясында катнасатаган ясларымызга, сонынъ ишинде Ислам Абдулбариевке де, уьйкен сеним этемиз эм оларга тувган ерине аман-эсен Енъуьв мен кайтканын йораймыз!
Г.Нурдинова.
Суьвретте:Ислам Абдулбариев.