Уллы композитор эм пианист Фредерик Шопен айткан: «Анъда Аталык йок, онынъ аталыгы – баьри дуныя». Сол дуныяга кирисип, оьзининъ талабын оьстирип келеди Сраждин Батыров атындагы саниятлар мектебининъ окувшысы Фатима Штар. Ол кишкейлей бу мектебке фортепиано боьлигине юрип баслады. Оны сол боьликте окытувшы Джамиля Залимхан кызы Аджиева хош коьрип алды. Ол баладынъ талабын биринши куьнлер ок та коьрди эм куьш салып аьрекет этуьв оьз емислерин де береегине бек сенди. Окытувшы ман окувшы араларында анъламлык эм дослык сезимлер тувдылар.

Буьгуьнлерде Фатимадынъ арымай-талмай ислеви, оьзининъ бар оьнерин оьстируьви босына кетпейди, ол туьрли шараларда катнасып, савгалы орынларга тийисли болып келеди. Ол республикалык шараларда да катнасады, айтпага, анъ, Г.Гасанов атындагы пианистлер шараларында катнасып, оьзининъ оьнерин коьрсеткен. Оьткен окув йылында Фатима Нальчик каласында йыл сайын оьтетаган халклар ара «Созвездие дружбы» конкурсында катнаскан эм алтын медалин алган. Бу шара Россия Федерациясынынъ маданият министерствосы, Юнеско, ООН-нынъ колтыклавы ман уйгынланады.
Фатима оьзи – баьри аьдемлер мен де катнаска тез кирисетаган аьдем. Онынъ анъ ман кызыксынувы да босына тувыл, онынъ атасы Рональд – анъды бек суьетаган аьдем, ол оьзининъ кызына кишкейлей классика анъларды тынълатып та уьйреткен болар.
Сондай талаплы балаларымыз буьгуьнлерде аз тувыл, тек алдыда сол талапларын оьрлендиретаганлар айлак коьп болмайды. Аьли биз Фатимада йогарыдан усындырылган талапты коьремиз эм келеекте оны айтылган кызларымыздынъ бириси болар деп сенемиз.
Фатима, алдыда сага уьстинликлер, яшав йолынъда тек ийгиликлер болсынлар деген йоравымызды этемиз.
М.Отевалиева.
Суьвретте: Фатима Штар.