Уьстимиздеги йылдынъ канътар айынынъ 24-нши куьниннен алып 25-нши куьнине дейим Россия Федерациясынынъ бас каласы Москвада «Аталыктынъ йыллык таварыхында меним аьелим» деген Савлайроссиялык форумы болып озды.

Форумда Россия Федерациясынынъ 18 субъектиннен ваькиллер ортакшылык эттилер. Форумда финалист эсабында бизим Ногай районымыздынъ яшавшысы, Карагас авылынынъ К.Кидирниязов атындагы орта мектебининъ ана тилден окытувшысы, ТОКС эм тарихши-краеведлер биригуьвининъ етекшиси Нурсият Зиявдин кызы Зарманбетова катнасты.
«Аталыктынъ йыллык таварыхында меним аьелим» деген Савлайроссиялык форумынынъ барысында доьрт туьрли майдан ис аьрекетин бардырды: «Ис аьрекет бойынша етимислер», «Маданият эм саният бо- йынша етимислер», «Коьп балалы ата-аналар», «Туьрли заманларда Аталыктынъ эркинлиги эм бойсынмаслыгы уьшин куьрескен Баьтирлер эм ветеранлар».
Нурсият Зиявдин кызы доьртинши майданда оьзининъ аьзирлеген куллыгын уьстинликли яклады. Ол Уллы Аталык согысында катнаскан аталары, ис аьрекети бойынша бизим республикамызда эм Карагас авыл орта мектебинде ТОКС козгалысы ман этилинетаган куллыклар акында йыйылганлар алдында хабарлап кетти.
Биз йогарыда айтып озганлай, бу форум эки куьн узагында озган эди. Биринши куьн форум катнасувшылары уьшин архив документлери уьстинде ислев бойынша анълатув сессиялар оьткерилдилер. Сол куьн пленарлы йыйыны ман тамамланды.
Экинши куьн болса, илми-практикалык семинары уйгынланды. Оннан сонъ, форум катнасувшыларына ВДНХ-да «Москва каласынынъ макети» деп экскурсия озгарылды.
Бу форум Нурсият Зиявдин кызы Зарманбетовадынъ эсинде яркын ыз калдырды.
Г.Сагиндикова.
Суьвретте: Н.Зарманбетова.