«Ногайский район» МР администрациясынынъ куллыкшылары, район Хатын-кызлар советининъ агзалары янъыларда Ногай районында орынласкан 03007 номерли аьскер боьлигининъ куллыкшыларын, ветеранларын эм аьскершилерди Аталыкты коршалавшы куьни мен кутладылар.

Аьскер боьлигининъ командири Магомед Гаджимагомедов келген конакларды хошлап, шарады ашты.

Сонъ ак юректен шатлык иелерин Хатын-кызлар советининъ председатели Асият Манкаева, онынъ коьмекшиси Алтынай Аджекова, аьскер боьлгининъ ветераны А.Тунгатаров, Хатын кызлар советининъ президиумынынъ агзасы Кизлярхан Асанова, «Яслык» яслар орталыгынынъ куллыкшысы Арслан Таушев кутладылар.

«Айланай» фольклор этнографиялык ансамблининъ артистлери Бегали Куруптурсунов, Ариф Темиров, Каирбек Кокенеев, Диана Сариева йырларын савкатладылар.

Солай ок Аталыкты саклавшыларды кутламага бу куьн окувшылар да келдилер, айтпага Даяна Кокенеева эм Амина Зуркарнаева. Шара сонъында аьскершилерге район администрациясынынъ коьмеги мен алынган таьтли зияпетлерге толы сыпырасын район Хатын-кызлар советининъ агзалары курдылар.

Н.Кожаева.
Суьвретте: А.Темиров «Офицерлер» йырын йырлаган мезгил.