Аталыкты коршалавшы куьнине багысланып Ногай районнынъ Терекли-Мектеб авылындагы Халк оьнер эм маданият орталыгында байрам шарасы оьткерилген.

Сонда Ногай район администрациясынынъ аькимбасы Джамалутдин Эсиргепов, онынъ орынбасары Баймагомед Ярлыкапов, район Савытлы куьшлер, ис эм ыхтыяр саклавшы органларынынъ Ветеранлар советининъ председатели Акманбет Сангишиев, район Ямагат палатасынынъ председатели Эльмурза Саитов, ис коллективлерининъ етекшилери эм ваькиллери, авыл яшавшылары катнастылар.
Армия эм флот ветеранларына, СВО катнасувшыларына каратылган кутлав соьзлери мен район етекшиси Д.Эсиргепов, район Ветеранлар советининъ председатели А.Сангишиев шыгып соьйледилер.
Залдагылар каты карс кагувлары ман йолыктылар авыр яраланувдан сонъ отпускка келген СВО катнасувшысы, 205-нши айырым казак мотострелковый бригададынъ роталарынынъ бирисининъ взвод командирининъ орынбасары, тамада лейтенант Ибрагим Нургишиевтинъ трибунага коьтерилуьвин.
– Буьгуьнлерде биз ясуьйкен несилимиз – бизим енъуьвши атайларымыз оьткен сынавларды оьтип турмыз. Биз эндигиси оларга кайтип авыр болганын, ама олар сол сынавларды йигитлерше оьтип енъгенлерин артык анълаймыз. Биз де олардай, бизим атайларымыздай болып, енъуьв мен кайтармыз! – деп сендирди оьз ердеслерин Ибрагим Нургишиев.
Байрам концертте атасы эм кызы Каирбек эм Даяна Кокенеевлер, «Карлыгашлар» биюв балалар ансамбли, яс йырлавшылар Роза Колебаева, Алима Лукманова, ДР ат казанган артистлери Зульфия Аджигеримова, Аминат Кудайбердиева, Муслим Шаникеев, Гульназ Теркеева, патшалык ногай драма театрынынъ артисткасы Диана Сариева ортакшылык эттилер.
Бизим хабаршы