Черкесск каласынынъ Баспа уьйининъ алдында эстеликли амаллама озды. Ол «Маьметекей» журналымыздынъ биринши бас редакторы, Карашай-Шеркеш Республикасынынъ халк шаири, Россия маданиятынынъ сыйлы куллыкшысы, Карашай-Шеркеш Республикасынынъ маданиятынынъ оьрметли аьрекетшиси Аскербий Суюн увылы Киреевтинъ атын оьмирлендируьвге багысланган эди.
Митингтинъ куллыгында КЧР Правительствосынынъ Председателининъ орынбасары Джанибек Суюнов, Черкесск каласынынъ аькимбасынынъ орынбасары Иналь Гашоков, оькиметлик службадынъ ветераны Ажмагомед Катаганов, Ногай муниципал район администрациясынынъ етекшисининъ орынбасары Али Санглибаев, «Ногай давысы» республикалык газетасынынъ бас редакторы-директоры Алтынай Атуова, «Маьметекей» республикалык адабиат-суьвретлев журналынынъ бас редакторы-директоры Асан Найманов, баспа амалларынынъ бас редакторлары эм журналистлери, шаирдинъ аьели, кардаш-тувганлары катнастылар.
Аскербий Киреев элли йылдынъ бо- йында журналистика тармагында – «Ногай давысы» республикалык газетасында билек туьрип куллык эткен. Сол заманнынъ ишинде коьплеген яс аьдемлерди журналистика тармагынынъ алдышылары болганларын суьйип демевлеп журналистикадынъ эм поэзиядынъ баьри сырларына да уьйреткен. Шаир балаларга сымарлап йырмадан артык китап шыгарган. Сондай болып ногай саьбийлерине тувган тилимиздинъ байлыгын уьйретуьв мыратта «Маьметекей» деген ат пан адабиат-суьвретлев журналын шыгарган. Айырым айтканда, онынъ ногай адабиатын эм маданиятын оьрлендируьвде уьлиси айлак уьйкен.
Йыйылганлар Аскербий Киреев акында йылы эскеруьв-лери мен боьлистилер. Сонынъ санында Аскербий Киреев пен бирге белсенли «Маьметекей» журналларын шыгарув ман каьрлеген ясуьйкенимиз Ажмагомед Катаганов шаирдинъ оьткен яшав эм яратувшылык йоллары акында толы хабарлады. Иналь Гашоков мемориал тактасын салдырув акында алынган токтасты окып эситтирди.
Мемориал тактасын ашувга ыхтыярды Джанибек Суюновка, Ажмагомед Катагановка эм Аскербий Киреевтинъ увылы Тимурга бердилер.
Неше йыллар озса да Аскербий Суюн увылынынь аты бизим юреклерде яшаяк. Аллах еннетли этсин! Барган дуныясы ярык болсын!
А.Найманов.
