Уьстимиздеги йылдынъ тамбыз айынынъ 4-нши куьнинде Татарстан Республикасынынъ бас каласы Казаньде атшабыс оьтетаган майданында йыл шагынынъ атшабыс базласы уйгынланып оьтти. Атшабыс озгарылатаган «Казань» деген Халклар ара ат спорты бойынша комплекси Россия элимиз бойынша ялгыз эм Европада энъ уьйкен деп саналады.

Онда туьрли йыныслы атлар атшабыслары оьтип келедилер. Ат спорты ман кызыксынган аьдемлер йыл бойынша туьрли савгаларына оьтетаган атшабыс ярысларында Татарстаннан, Удмуртия, Марий Эл Республикалардан, Сызрань, Челябинск, Пермь калаларыннан, Оренбург, Свердловск, Ульяновск областьлери эм сондай баска ерлерден катнасып келедилер. Бу йыл сол сырага Дагестан Республикасынынъ Ногай районыннан да косылмага амал таптылар. Йылдынъ яз шагынынъ атшабысында Дагестаннынъ Ногай районынынъ атыннан «Куьнбатар» деген атлар клубынынъ, айтпага, Радомир, Анчар, Сальвия Йорк, Эйр Сикрет эм Лязат деген бес аргымаклары атшабыста ортакшылык эттилер. Айтып озайык, «Куьнбатар» деген атлар клубы Ногай районынынъ Куьнбатар авылында орынласкан.
Бу йылдынъ тамбыз айынынъ басында Казань каласындагы оьтеек атшабысларда йыл шагы бойынша базласувында уьйкен язгы шак савгасы уьшин 1600 шакырым ерге шавып, Радомир деген аргымагы 1 такыйка 42.30 секундалар заманы ман келип, 1-нши орынды, Анчар деген аты 1 такыйка 42.478 секундалар заманы ишинде келип 3-нши орынды бийледилер. Солай болып, пробный савгасын 1200 шакырым ерге атшабыста Лязат деген байталы 1 такыйка 19.290 заман ишинде келуьви мен 2-нши орынга тийисли этилди.
Бу уьйкен язгы шагынынъ савгасы Россия бойынша 1-нши куьпке киретаган атшабыслардынъ бириси деп саналады. Оннан бираз алдын курал айынынъ 14-нши куьнинде Казань каласынынъ атшабыс майданында Куьнбатар атлар клубынынъ Ораза байрам савгасына багысланган ярыста 1800 шакырымга шабувында Анчар деген аты Ногай районына 1-нши орынды аькелди, Эйр Сикрет деген аты Халклар ара медициналык куллыкшыларынынъ куьнине багысланган савга уьшин базласувда 1600 шакырым ерге шабувда 4-нши орынды бийледи.
Сол кызыклы эм пайдалы атшабыс ярысларын уйгынлы озгарувда, баргылы орынларга тийисли болувында бу пайдалы эм кызыклы исти баславшылары тренер Кувандык Керимкуловка, жокей Спиридон Тимофеевке, Александр Лихановка, ат айдавшы эм тренер коьмекшиси Колбай Эсенбековка, «Куьнбатар» деген атлар клубынынъ ваькиллери Темирлан Озганбаевке, Эдил Махмудовка уьйкен разылыгын билдиредилер.
Келеекте де «Куьнбатар» деген атлар клубынынъ аргымаклары, халкымыздынъ атын халклар ара коьтерип, данъклатып келгенин, баргылы орынларына етискенди, енъуьвлерди куьтемиз.
Г.Нурдинова.
Суьвретте: солдан онъга К.Есенбеков, К.Керемкулов, Э.Махмудов «Куьнбатар» атлар клубынынъ енъуьвши атлары ман.