Баладынъ уьстинлиги кайбиримизге де уьйкен куьез. Апыл-тапыл аягын басып, юргенине, биринши соьзди айтканына, саркылдап куьлгенине баьримиз де суьйинемиз. Соьйтип, Айсылу Шамшидиновадынъ ата-анасы да онынъ уьстинликлерине суьйинедилер.

Айсылу бес ясында китаплер окыйтаган эди, яттан ятлавлар айтатаган болган, кызалак бийимеге эм йырламага суьеди. Аьлиги заманда Айсылу — Карасу авыл орта мектебининъ 7-нши классынынъ окувшысы. Кызды тенълери де, окытувшылар да билимли эм яваплы деп белгилейдилер. Ол туьрли мектеб, муниципаллык олимпиадаларда катнасады эм енъуьвши болады. Соннан баскалай, Айсылу спорт ярысларда да катнасады. Соьйтип, Айсылу «Сол заманда биз аьли де йок эдик» деп аталган Савлайроссиялык яратувшылык конкурсында «Мен согысты ясайман» номинация бойынша енъуьвши болган. Биринши орынды билимли кызалак Савлайроссиялык сочинениелер конкурсынынъ муниципаллык кезегинде эм регионаллык кезегинде уьшинши орынды алган. Айсылу «Балалар терроризмге карсы» муниципаллык конкурсында катнасканы уьшин, йогары яратувшылык усталыгы уьшин, С.Батыров атындагы саниятлар мектебиннен Сый грамотага тийисли болган. «Оьзинъди терге» олимпиадаларда катнасканы уьшин Айсылу Шамшидиновадынъ ата-анасына разылык хат келди. Онда булай язылган: «Сизинъ кызынъыз Шамшидинова Айсылу халклар ара олимпиадаларда белсен катнасатаганы уьшин разылык билдиремиз. Сизинъ баланъыз оьзин сезгир эм талаплы окувшы деп коьрсеткен. Кашан да, бу сизинъ арканъыз бан этилген ис. Ата-анадынъ коьтергишлеви балага бек маьнели эм ога янъы енъуьвлерге етпеге коьмек этеди. Биз шекленмеймиз, сизинъ баланъыз аьли де бизди уьстинликлери мен суьйинтер. Биз оны бизим олимпиадаларымыздынъ катнасувшыларынынъ сырасында коьрмеге разы». Кызалак анасына да ийги коьмекши болады, ас аспага, туьрли таьтли зияпетлер писирмеге суьеди.
Айсылудынъ енъуьвлери аьли де алдыда деген сеним мен кызга коьп уьстинликлер, ашык йоллар сагынамыз.
Г.Бекмуратова.
Суьвретте: А.Шамшидинова.