Дуныяда туьрли кеспилер аз тувыл. Анълайман, аьр бирисининъ ери де, маьнеси де бар, ама солардынъ ишинде энъ де маьнели деп врач кесписин санайман. Булай алып караганда, аьдемнинъ ден савлыгын саклайтаган кеспилер баьриси де сыйлавга тийисли болады.
Кеспили врач болув уьшин, сол кеспиди сайлаган аьдемге айлак авыр эм узак йолды оьтпеге керек болады. Биревлерге сол сайлаган йогары окув ошагында окув енъил оьтеди, баскаларга айлак авыр болган ерлер де расадылар. Кыйынлыгы сол, мектебтен сонъ, мундагы коьлем билдируьвлерге уьйренмеге енъиллерден тувыл. Медицина йогары окув ошагында окув эртенъги тогыз саьаттен алып кешки 6-7 саьатлерге дейим бардырылады. Ол уьйге кайтып келгеннен сонъ да, онынъ окувы бу куьнге кутылды деп айтып болмайсынъ, ол асын ишкеннен сонъ да, эртенъги куьнге окувларды, уьйге берилген ислерди этпеге туьседи. Эгер юридический яде экономический йогары окув ошакларынынъ студентлеринде тыншаймага заман болатаган болса, медициналык йогары окув ошагынынъ студентинде сондай мырсат йок, ол куьн ярыгын коьрмей, заманын окувга багыслап озгарады.
Медициналык йогары окув ошагына туьскен студентлердинъ коьбисин кесписине ювык болмаган сабакларды окув да бездиреди. Олар сол сабаклардынъ окув ошагында болганына ашувлы болган ерлер де болады.Туьске дейим оьзлерине керекли сабаклар болса, туьстен сонъ, студенттинъ оьзининъ яшавы эм дерислерге аьзирлик коьрер эдилер. Йылдан-йылга медициналык йогары окув ошагынынъ студентининъ окувы туьрленеди. Ол тек оьз кесписи бойынша керекли сабакларды окып баслайды. Доьртинши курска еткен медициналык окув ошагынынъ студенти тынысын енъил алып баслайды. Сондай студентлердинъ бириси Фарида Айдархан кызы Курманбаева болады.
Фарида бу йылгы Студентлер куьнин Сырт-Осетиядынъ Владикавказ каласындагы медициналык академиясынынъ лечебный факультетининъ 4-нши курсынынъ студенти болып йолыгады. Фаридадынъ окымыслыгы, куллыксуьерлиги ийги етимислерге етпеге ярдам этеди.
Врачлар – олар айырым касиетли аьдемлер. Халк арасында: «Медициналык куллыкшыларды коьз бен коьрип, юзлерине карап, айырмага болады», – дейдилер. Кеспили врачлар да, медик студентлер де сол кастага киредилер – олар коьп затлары ман баскаланадылар. Оларды кайтип айырмага болады деп сорайсыз ба? Олар баьриси де ис аьрекетин бардырганша, окыган ерлеринде ак туьсли халатлар киедилер. Сол коьбиси биринши курслардынъ студентлерине ярайды, олар кырга да сол кийим мен шыгып, орамдагыларды сейирге калдырмага суьедилер.
Медицина кесписин сайлаган аьдемнинъ юреги айлак юмсак болмага керек тувыл, йок, бу ерде мен языксынув касиет акында айтпайман, языксынув баьри аьдемшилиги болган, тири янда болады. Врач кайдай аьлге туьскен авырувлы аьдемди де карамага болады, катылыктынъ кереги сол, эгер ол айлак зыян келтирилген аьдем кевдесин коьргенде, оьзи сескенсе, ярдамын да этип болмаска болады.
Мен Фаридадынъ акында коьп ийги соьзлер эртеректен эситкен болсам да, оны бир де коьрмеген эдим. Янъы окув йылы басланаяктан алдын, Терекли-Мектебтинъ А.Ш.Джанибеков атындагы мектебине куллыгым болып, бармага туьсти. Соьйтип, Фарида ман экевимизге бир ерде йолыгыспага туьсти. Экевимиз де бир аьдемди саклап турымыз, янымызда биздей бир неше аьдем де бар, солар арасында меним танысым, оны ман оьзимизге ювык темага соьйлеймиз, бизге Фарида да косылады. Сонъында хабарлай келе, ол медициналык йогары окув ошагынынъ студенти экенин айтады. Биринши караска, ол бек каьмбил, айлак терен ойлары ман яс аьдем болып коьринди. Ол мени соьйлеген соьзи мен, турган турысы ман есирге алды. Мен ол кимнинъ кызы экенин сорап билгеннен сонъ, онынъ акында алдына эситкен хабарларымды байланыстыраман эм солардынъ аьр бириси акыйкат экенин оьзиме белгилеймен.
Аьдемнинъ касиети, турган турысы онынъ келеектегиси акында аз зат айтпайды. Меним ойыма коьре, Фарида келеекте айлак билимли, аьдил, аьдемшилиги йогары аьлдеги специалист болаягы коьринеди. Мен ога бу йылгы студент куьни шат болып келгенди, йылдан-йылга беркуьвди эм ден савлыкты йорайман. Онынъ эм сондай яслардынъ бу куьнги савлыгы – бир нешевдинъ куткарылган кыйынлыгы эм наьсипли яшавы.
Г.Сагиндикова.
Суьвретте: Ф.Курманбаева.
