Оьзининъ кеспи байрамын йыл сайын 25-нши мартта аьлемет исин бардыратаган, зейинлик пен Кудай усындырган, яркын, яратувшылы аьдемлер – маданият куллыкшылары белгилейдилер. Бизим элимизде маданият эм санияттынъ туьрли тармакларында куллык эткен аьдемлерге багысланган туьрли байрам куьнлер болганга карамастан, бу байрам баьрин де биргелестиреди – бизим элимиздинъ маданиятын саклавшыларды да, онынъ оьрленуьвине уьлис косып келгенлерди де.
Россиядынъ маданияты коьплеген оьмирлер бойында туьзилген, эм буьгуьнлерде ол, туьрли халклардынъ аьлемет аьдетлерин эм етимислерин биргелестирип, ортак миллетлик байлыгы болады. Маданият куллыкшыларынынъ иси аркалы миллионлаган аьдемлердинъ суьврет ясав, скульптура эм кинематография шыгармалары ман сукланмага, ийги анъ тынъламага, драма эм биюв санияты ман куьезленмеге эплери болады. Маданият куллыкшылары элимиздинъ кайсы муьйислеринде де аьдемлерге суьйиниш савкатлап келедилер. Аьдемлерге суьйиниш эм янынынъ йылувын савкатлап оьз аьрекетин бардырады Ногай районындагы Халк яратувшылыгынынъ эм маданият оьрленуьвининъ орталыгынынъ художестволык етекшиси Бурлиянт Курманова.
Бурлиянт Курманова Кумлы авылында тувып-оьскен. Ол мектебте окыган йыллардан алып маданият исине ювык болган. Бурлиянт мектебте окыган йылларда мунда озган бир шара да онсыз оьтпеген, баьри шараларда да кызалак катнаскан. Балалай ол халк алдына шыгып йырлап, бийип, ойнап, келеекте байырлаяк кесписине аьзирленген болар.
Кеспи байырлар ниетте, Бурлиянт Курманова Карашай-Шеркеш педагогикалык университетининъ филология факультетинде окыйды. Йогары окув ошагында да ол окытувшы Аминат Шутуковадынъ етекшилиги астында биюв кружогында катнасады. Университетте озган шараларда баска кызлар ман бирге миллет кийим кийип, биюви мен, коьплерди сукландырады. Окув ошагын кутарып, яс кыз оьз ис аьрекетин орыс тилининъ эм адабиатынынъ окытувшысы болып Шумлелик авылында баслайды. Балаларга билим беруьв эм тербиялав исин Бурлиянт Курманова 7 йыл узагына бардырады. Аьдем кайдай йолларды сайласа да, бакты оьзининъ язганына, буйыртканына кайтип те аькеледи. Соьйтип бакты Бурлиянтты Халк яратувшылыгынынъ эм маданият оьрленуьвининъ орталыгына аькеледи.
– Маданият тармагында мен 2008-нши йылдан алып ислеймен. Куллыгым ман яшайман деп айтсам, оьтирик болмас, неге десе куллыктан бос заманда да уьйимде, конакта яде орам ман бараятканда, тезден белгиленеек байрам, озгарылаяк шара акында ойланаман, янъы зат туьземен. Уьйкен разылыгымды билдирмеге суьемен ДР ат казанган маданият куллыкшысы, коьлем шаралар режиссеры, Ногай район орталык китапханасынынъ директоры, меним етекшим Сабират Абубекеровага. Ол бизди сахнада кайтип оьзин юритпеге, кайтип соьйлемеге керегин эм баска коьп затларга уьйретти. Бир соьз бен айтканда, бу куьнлерде меним аьли юриткен куллыгымнан тура баьри билгеним – Сабират Казгереевнадынъ етимиси. Бактыма мен бек разыман сондай аьдем мен, оьз исининъ устасы ман бирге ислеп, оннан сулып алмага буйыртканына, – деп етекшиси акында айтады Бурлиянт Курманова.
Ийги иси уьшин Бурлиянт Курмановага янъыларда Ногай район аькимбасы М.Аджековтан Сый грамота тапшырылды. Солай ок Сый грамоталар ога Ногай районынынъ 90 йыллыгын белгилев мен байланыста «Ногайский район» МР администрациясыннан эм Россия ногайларынынъ федераллык миллет-маданият автономиясынынъ Оьр Советининъ председателининъ атыннан берилген.
Халк яратувшылыгынынъ эм маданият оьрленуьвининъ художестволык етекшисининъ иси бизим коьзимиздинъ алдында. Онынъ туьрли байрамларда картларга эм ясларга суьйиниш савкатлап турганынынъ шайытлары биз неше де болганмыз. Неше де маданият тармагынынъ куллыкшысынынъ йолдаслары ман бирге сахнада оьзин юритуьвине эм куллыгын бардырувына баска каравшылар ман бирге куьез бен караганмыз, ога исиннен тура мактав соьзлер айтылганын да эситкенмиз. Бурлиянт Курмановага эм баьри маданият куллыкшыларына кеспи байрамында ислеринде уьстинликлер, таьвесилмес яратувшылык кайратлык йораймыз.
Н.Кожаева.
Суьвретте: Б.Курманова.
