Бу куьнлерге Россияда коронавируслы юкпалы маразыннан эки вакцина эсапка алынган. COVID-19 юкпалы маразына карсы элимиздеги эм дуныядагы энъ де биринши вакцина бу йылдынъ сары тамбыз айынынъ 11-нши куьнинде эсапка алынган. Препарат Гамалей атындагы орталыгынынъ негизинде шыгарылган эм «Спутник V» деп аталган. Экинши вакцинадынъ эсапка алынганы акында казан айдынъ 14-нши куьнинде белгили болды. Препаратка «ЭпиВакКорона» деген ат берилди. Онынъ уьстинде «Вектор» патшалык илми орталыгы иследи.
РФ Савлык саклав министри Михаил Мурашкодынъ айтувы ман, коронавируслы юкпалы маразыннан вакцинация Россияда аьдемлердинъ аваслыгына коьре этилинеек, яшавшылар болса, оны ман уьйкен кызыксынувын коьрсетедилер. Россиянлардынъ коьлем вакцинациясы караша айдынъ ызында, карагыс айдынъ басында басланмага болады.
– Элимизде мараздынъ яйылувынынъ токтавы акында айтув аьли де эрте, ама ол, яшавшыларга вакцинация этилинсе, асталанар. Аьллер иммунитети болганлардынъ оьлшемине бойсынады. Эпидемиология законлары бойынша яйылув маразы иммунитети болганлардынъ оьлшеми 60% болса, асталанады, 80% болса, токтайды. Бас деп врачларга эм окытувшыларга вакцинация этилинмеге керек, неге десе олар коьп аьдемлер мен ислейдилер, йолыгысадылар. Солай ок 65 ясыннан оьткен ясуьйкенлерге де эм авыр маразлары болганларга да баслапкылар сырасында вакцинация этилинмеге тийисли. Эсте саклав керек, вакцинация тек врач караганнан сонъ этилинеди, – дейди медицина илмилерининъ докторы, врач-иммунолог Владислав Жемчугов.
Роспотребнадзордынъ эпидемиологиялык Орталык илми-тергев институтынынъ илми куллыгы бойынша директорынынъ орынбасары Александр Горелов коронавирустан вакцинация этилинеектен алдын гражданларга оьзлерининъ авырувларын ясырмага ярамайтаганын айтады.
– Вакцинациядынъ сырагыларын россиянлылар бир йылдан яде оннан да артык заманнан сонъ сезбеге болаяклар, – деп санайды вирусолог, медицина илмилерининъ докторы Анатолий Альтштейн. Онынъ соьзлери мен, сога гражданлардынъ аталык препаратына сенмевлиги болады.
– Яйылув маразын тоьменлетер уьшин 70 процент элдинъ яшавшыларына вакцинация этилинмеге тийисли. Аьли вакцинацияга карсы карасларга коьре, сол зат тез бола коймас, – дейди Анатолий Альтштейн.
– Дагестан Республикасына кырк кийик айында вакцинадынъ 42 оьлшеми аькелинген. Бу вакциналар республикамызда бас деп «Кызыл зонада» ислейтаган медицина куллыкшыларына этилинди. Ногай районында коронавируслы юкпалы маразына карсы вакцинация аьли де биревге де этилингени йок. Прививка аьдемлердинъ аваслыгына коьре этилинген. Ол коронавируслы маразы ман авырып, савболганларга тийисли болжал оьткенше, солай ок шаркы авыр хатынларга этилинмеек, – дейди «Ногайская ЦРБ» бас врачынынъ методикалык боьлигининъ уйгынлав бойынша орынбасары Зульфия Шугаипова.
Н.Кожаева.
