Аьел – аьр бир аьдемнинъ яшавында энъ де бас эм баалы зат. Уьстимиздеги йылдынъ курал айынынъ 18-нши куьнинде Халклар ара аьел куьнине багысланган байрам шарасы уйгынланып оьтти. Ямагаттынъ аьел баалыкларын эм аьдетлерин саклав бойынша эсин каратув шарадынъ бас мыратларынынъ бириси эди.
«Сыйлы ис йолдасларым! Аьел куьнинде баьри аьеллерге де берекетти, суьйимди, акылбалыкты, шыдамлыкты йорайман. Дайым уьйлеринъизде саьбий куьлкиси эситилсин, кардаш-тувганлар сенимли тирев болсын. Аьелдинъ берк болувы аьдемге сенимликти, янъы затты туьзуьвде демевлик береди, суьйиништи оьстиреди, мунъшылыкта ярдамласады», – деди оьз ис йолдасларына каратылган кутлав соьзинде Ногай район орталык больницасынынъ бас врачы Фаризат Янибековна Межитова. Баска болып, онынъ белгилеви мен, олардынъ ис йолдаслары арасында атлары белгили врачлар аз тувыл. Айтпага, Арслановлар аьелиннен уьш несил врачлар шыкканлар. Басында – ДР ат казанган врачы, хирург, медициналык илмилерининь кандидаты Ахмат Сулейманович эм врач-педиатр Савкат Баевна Арслановлар. Олардынъ уьш кызлары да оьз ата-анасынынъ йолын ызладылар. Марина Ахматовна эм Мадина Ахматовна буьгуьнлерде ерли медицина коллективинде медициналык институтты тамамлавыннан алып фтизиопедиатр эм поликлиникадынъ етекшиси болып аьрекет этип келедилер. Амина Ахматовна кесписи бойынша – врач стоматолог, аьлиги заманда Сургут каласынынъ клиника больницасында ОМО врач методисти ис аьрекети мен каьрлейди. Буьгуьнлерде врачлардынъ аьел династиясын Ахмат Сулейманович Арслановтынъ уныклары да бардырадылар.
Солай болып, Фаризат Янибековна ДР-нынъ ат казанган врачы Асрет Сарсеевна Абдурахмановадынъ аьели акында да белгилеп кетти.
2008-2009-ншы йылларда Ногай район орталык больницасынынъ бас врачы ис аьрекетин юриткен Асрет Сарсеевна Абдурахмановадынъ йолын алып, онынъ уьш аьвлетлери де врач кесписин юрек шакырувлары ман сайлаганлар. Кедеси Мурат Нурсаидович – балаларды эмлевши йогары квалификациялык врач хирургы. Аьлиги заманда Сургут каласындагы 1-нши номерли клиника больницасынынъ боьлик етекшиси. Кызы Алимет Бальгишиева – йогары дережели педиатр врачы исин Сургут каласынынъ реабилитация орталыгында юритеди. Кишкей кызы Элина Саитова 2019-ншы йыл аспирантурады тамамлаган эм ога «Исследователь. Преподаватель-исследователь» деген квалификациясы берилген, буьгуьнлерде Сургут каласында педиатр врачы болып реабилитация орталыгында етимисли куллык этеди.
Асрет Сарсеевнадынъ йолы ман онынъ йиени Камиля эм уныгы Фатима да барадылар, олар врач кесписин сайлаганлар эм буьгуьнлерде медициналык ошакларынынъ студентлери боладылар.
Баска болып, Халклар ара аьел куьни мен Фаризат Янибековна коьп балалы Тилековлардынъ эм Курманбаевлер аьеллерин кутлады. Район орталык больницасынынъ етекшисининъ соьзи мен, Заур эм район орталык больницасынынъ терапевт боьлигининь медсестрасы Наида Тилековлардынъ татым аьелинде бес аьвлет тербияланадылар. Адилсолтан эм терапевт боьлигининъ медсестрасы Амина Муртазалиевна Курманбаевлер доьрт аьвлетлерининъ ата-аналары боладылар.
Солай болып, Фаризат Межитова аьелдинь медициналык куллыкшысынынъ, боьтен де, авыл ериндеги савлыкты саклав аьллеринде кайбир заманларда ердеслеримиздинь яшавын эм ден савлыгын биринши орынга салып, аьел кызыксынувларын артка калдырмага да керек болатаганын айтып белгиледи. Соьйтип, ол ис йолдасларына кеспидинъ эм ис аьрекетининъ маьнелигин анълаганлары, шыдамлык эм демевлиги уьшин оларга разылыгын билдирди. Оларга бир-бирин коршалап, кардаш-тувганлары, ювыклары ман озгарган аьр бир вакытты баалап билмеге, аьелде аьр кимге де оьз суьйимин ясырмай коьрсеткенди йорады.
Шарадынъ сонъында йогарыда белгиленген аьел ваькиллерине эстеликли савга эм шешекей байламы тапшырылды.
Соьйтип, байрам шарасы йылы эм шатлыклы аьлде озды.
Суьвретте: Наида Тилековага савга тапшырылув мезгили.
