Савлай дуныя юзинде оьз ызларын калдыратаган коронавируслы юкпалы мараз аьр биримиздинъ ден савлыгына уьйкен кавыфлык тувдырады. Боьтен де ол биздей эсли аьдемлерди кыйнайды, неге десе бизим аьримизде кайдай да болсын, оьзимиз уьйренген эм ызгы заманларда уьйшиликте врачтынъ тергеви астында эмленип, яшав оьмиримизди бардырамыз.

Эм эндиги бу коронавируслы маразы юкса да, ден савлыгымызга уьйкен кавыфлык тувады. Сонынъ уьшин авырувдан коршаланмага керекпиз эм бу ерде бизим тек бир эбимиз бар – вакцинация процедурасын оьтуьв. Оьзек те, вакциналардынъ ден савлыкка келтиретаган зыянлыгы акында коьп билдируьвлер бар, ама оларга маьне бермей, медицина тармагынынъ специалист-аналитиклерининъ ой-токтасларына негизленип, мен бираз шекленсем де, сонъында каты ойда турып, коронавируслы инфекциядан прививка эттирдим. Эм эндиги бу эткеним дурыс деп ойлайман, неге десе оькимет ягыннан токтастырылган тыйдажылык йорыкларды тутпаймыз, неге десе эл ишинде яшап, эл аьдет-йорыкларына бойсынмай турып болмаймыз. Олай деген, коьлем аьдемлер йыйылатаган ерлерге ( кайгылар ман байланыслы дуаслар, туьрли той-яхшылыклар ) бармай болмаймыз. Сондай ерлерде бу кавыфлы маразды юктырмага болады, сонъ бу мараздынъ уьйшиликте балаларга эм уныкларга коьшуьв кавыфлыгы бар.
Сонынъ уьшин баьри ювыкларыма, кардаш-тувганларыма, кыймас-досларыма айтпага суьемен: вакцинадынъ зарарлыгы акында ялган билдируьвлерге ынанманъыз, эш бир заттан коркпанъыз, бу кавыфлы маразды юктырганша, заманынъызды босына йибермей, вакцинация процедурасын оьтуьвден бас акашпанъыз. Эсимизде саклайык: аьдемнинъ бас байлыгы – ден савлык. Оны берк саклавга куьшимизди аямайык.
Р.Менлиалиева, маданият куллыкшысы.