(Басы 40-ншы номерде)
– Калай болады экен, яс, аьли де сулыбы йок куллыкшы исин соьйтип ийги этип толтырады? – деп сорады ол меннен. Сонъ ол мага етиспевликлеримди коьрсетти, олар коьп тувыл эди, болса да, тергевшидинъ айтувы ман, солар мени тутнакка да аькелмеге болганлар. Соьйтип, мен бир сезон иследим, етекшим Хусин Магомед увылы Джумагулов эм бухгалтер Мария Илья кызы Даутова меним исимди ийги деп белгиледилер. Мен ойлайман, Роман Еслемесов олар ман сондай яс аьдемди яваплы иске алгансыз деп соьйлегендир. Сонъында мен атам ман бирге Роман Абдулла увылы ман коьристим, атама бизим алдынгы йолыгысымыз акында айттым. Сол заманда атам айтты: «Роман Абдулла увылы сенинъ келеектегинъди ойлаган, ким биле, бир малиетсиз зат уьшин куьнасиз аьдем де дембиге йолыктырылмага болады. Янъылыс йиберип койса, яшавы бузылар деп кыйналган». Сол заманда мен анъладым, кайдай яваплы куллыкта ислегенмен мен. Коьп затларды анъладым, ислегенде, сак болып ислев керек. Соны мага Роман-авылшым ман йолыгысым анълатты.
Роман Еслемесов оьз кеспи сулыбын, билимин йылдан-йылга оьстируьв ниет пен Россия МВД бойынша окув ошакларында окыган. 2002-нши йылдан алып Роман Абдулла увылы Ямало-Ненецский автономлы округта иш ислер боьлигининъ етекшиси болып куллык эткен. Буьгуьнлерде онынъ кеспи усталыгы, берк билими, етискен уьстинликлери акында айтып басласак, хабарымыз узын болар. Роман Еслемесовтынъ сый-абырайы йылдан-йылга арткан, оны танымаган эм сыйламаган аьдем аз болар. Кишкей ата юртыннан узак ерде яшаган эм ислеген ол, болса да бир куьнге де оьз тувган ерин мутпаган, мен де оны оьз халкы, авылы, Эли уьшин коьп куллык эткен инсан деп таныйман. Роман Абдулла увылы язувшыларга китаплер шыгармага, туьрли шаралар озгармага спонсорлык ярдамын эткен, ясларга куллык таппага коьмек эткен, биринши болып керексингенлерге колын созган. Тийисли тыншаювга кеткен сонъ да, Роман Еслемесов халкынынъ ойы-ниети мен яшаган.
Биз оьктемсиймиз сондай ердеслеримиз бен, ким, йогары дережели куллыкларына карамастан, халк пан бирге болганлар. Аьлиги заманда меним эсиме бир ой келеди – Роман Еслемесов оьз атасына аьдемшилиги мен, йигерлиги мен, халкына, элине пайдалы болып, куллык этуьви мен усаган. Сондай инсанлар халк арасында сый казанадылар. Роман Абдулла увылы бу яшавда оьз борышын толтырган эм бизим эсимизде эм юреклеримизде яркын юлдыз болып калган. Ногай халкымыздынъ бир кесеги, Роман Еслемесов баьримиз бен де оьзининъ кенъ эм юмарт юреги мен боьлискен.
А.Тамакаев,
Россия Федерациясынынъ Журналистлер союзынынъ агзасы.