Россия ясларынынъ куьни официаллык аьлде РФ Биринши Президенти Б.Н.Ельциннинъ «Яслар куьнин байрамшылав акында» распоряжениеси мен (№459-рп 24 июня 1993й.) келисте 12-нши июньде белгиленеди. Ол Яслар ислери бойынша РФ Комитетининъ эм Яслар биригуьвлерининъ миллет советининъ баславы ман байрамшыланады.
Оьз тарихин байрам СССР заманларыннан алып баслайды. 1993-нши йылга дейим ол «Совет ясларынынъ куьни» деп аталатаган эм 1953-нши йылдан алып июнь айынынъ уьшинши тыншаюв куьнинде белгиленетаган эди. СССР бузылганнан сонъ, Россиядынъ Биринши Президенти Яслар куьнин байрамшылавды 27-нши июнине коьширген.
Россия яслары – ол 15 ясыннан 29 ясына дейимги 24,3 млн. гражданлар, олар (2020-ншы йылдынъ билдируьвлерине коьре) – элимиздинъ баьри яшавшыларынынъ 16,5 %. 2020-ншы йылдынъ 11-нши ноябринде РФ Государство- лык Думасы яслардынъ ясын 35-ке (14-тен 35) дейим коьтеруьв акында проектти яклады.
Оьспирлик эм яслык – ол аьр аьдемнинъ яшавында энъ яркын шаклары, солай ок аьдем ян тоьрининъ айырым аьли. Ол – излестируьв эм иркилмей, коркпай энъ туьрли проектлерди яшавга шыгарув заманы. Олар, буьгуьнги окувшылар, студентлер, яс исшилер, предпринимательлер, аьлимлер тезден оькиметимиздинъ оьрленуьв йолларын белгилееклер.
Россияда яслар яшавда оьз орынын тапсын уьшин коьп зат этилинеди. Яс несил акында каьр шегуьв деген социаллык политикасынынъ маьнели кесеги болады. Яслар политикасы туьзилген эм яшавга шыгарылады. Оькимет яс аьеллерге ярдамын тийгистеди. Орта, йогары, специальлик билимлер алув уьшин амаллар кенъееди. Кенъ аьлинде оьрленип басланды оьспир эм яслар клублары эм орталыклары. Уьйкен эс каратылады яслар арасында куллыксызлыкты кемитуьв уьшин. Айтпага, 2018-нши йылда РФ Президентининъ баславы ман савлай Россия ерлериннен яслардынъ кадрлык, социаллык эм билимлендируьв проектлерин бириктирген «Россия – страна возможностей» деген автономлык коммерциялык тувыл организация туьзилген. Проектлердинъ ортак мырады – оьзин коьрсетпеге суьйген, талап, кеспилик болымлыгын, бизнес-ой-токтасувларын яшавга шыгармага ниетленген аьр яс аьдемге бирдей эп-амаллар туьзуьв.
Аьлиги заманда оьз аьрекетинде белсенлигин коьрсетеди волонтерлар козгалысы да. Яслар ман куллык этуьвдинъ маьнели кесеги тек яслар политикасында тувыл, солай ок социаллык исинде де яшавга шыгарылады. Талаплы, зейинли ясла уьшин специальлик билимлендируьв орталыклар уйгынланган: «Сириус» (Сочи каласы), «Артек» (Крым ери), «Орленок» (Краснодар крайы), «Океан» (Владивосток каласы).
Бу баьри затлар Россия гражданлары элимиздинъ шынты патриотлары болсын уьшин этиледи. Байрам куьни шатлыклы аьлде туьрли спорт, маданият эм билимлендируьв шаралар оьткеруьв мен белгиленеди.
