Дагестан Республикасынынъ Аькимбасынынъ куллыгын юритуьвшиси Сергей Меликов пан, 1994-нши йылдынъ карагыс айынынъ 21-нши куьнинде алынган «О защите населения и территорий от чрезвычайных ситуаций природного и техногенного характера» деген 68-нши номерли Федераллык законына коьре, караша айынынъ 23-нши куьнинде Дагестан Республикасынынъ Ногай эм Тарумов районларынынъ япсарларында аьдеттегиннен тыскары аьллер киргистилгени акында Указ кабыл этилинип алынды.

Сога коьре, республикамыздынъ бир неше районларында малдынъ коьплигиннен, табиаттынъ туьрленуьвиннен, еллердинъ де коьп эсуьвлериннен ердинъ тийисли йорыклары бузылып, кум-такырга айланганы белгили болады.
Дагестан Республикасынынъ Аькимбасынынъ куллыгын юритуьвшиси Сергей Меликовтынъ шыгарган Указына коьре, аьдеттегиннен тыскары аьллер киргистилгеннен баска болып, сол не себептен киргистилгенине коьре, ис аьрекетти бардырмага керек болады.
Аьдеттегиден тыскары аьллер эм алдын шалув шаралардынъ ортак патшалык тармагынынъ астындагы республикалык куьшлер эм управлениелер органларына эс этуьв уьшин региональлик дережеди беркитпеге де борыш салынады. Баьри борышларды толтырувды тергев эм сол исти етекшилев Дагестан Республикасынынъ Авылхозяйство эм савда министри А.Гусейновка тапшырылды.
Баьри яктан да коьмегин этпеге Россия Федерациясынынъ гражданлык оборона ислери бойынша министерствосынынъ бас управлениесине баьри яктан да оьз коьмегин этпеге борыш салынады. Этилинетаган куллыклар акында туьрли СМИ-лер аркалы халкка да билдирилип турмага керек. Муниципаллык район администрацияларынынъ аькимбаслары алдыларына да борышлар салынадылар. Олар болса, сол беркитилген ДР Аькимбасынынъ куллыгын юритуьвшиси Сергей Меликовтынъ шыгарган Указынынъ биринши пунктына коьре: оьзлерининъ куьшлери еткен шаклы, аьдеттегиден тыскары аьллерди енъиллетер уьшин шаралардынъ планын туьзуьв; ямагатка аьдеттегиден тыскары аьллер акында билдирип турув.
Дагестан Республикасынынъ Авылхозяйство эм савда министерствосына районлардагы аьдеттегиден тыскары аьллерди тайдырар уьшин этилинетаган шараларды озгарувда баьри яктан да колтыклав этпеге керек. Указ бойынша баьри салынган борышларды да Дагестан Республикасынынъ Оькиметининъ Председателининъ орынбасары А.Абдулмуслимовка тергемеге борыш салынды.
Указ кол басылган куьннен алып куьшине кирген.