Йыл сайын 8-нши июльде маьнели россиялык байрамларынынъ бириси – Савлайроссиялык Аьел, суьйим эм алаллык куьни белгиленеди. Биринши кере ол байрам куьни эсабында 2008-нши йылда белгиленди.

Бу байрам РФ Государстволык Думасынынъ депутатларынынъ баславы ман токтастырылган. Ол Россиядынъ аьдеттеги баьри дин организациялар ман макул коьрилген.
Быйыл Аьел, суьйим эм алаллык куьни Россия Президенти Владимир Путиннинъ кабыл этип алган Указына коьре официаллык аьлде байрамшыланады.
Байрамнынъ белгиси – «Суьйим эм алаллык уьшин» деген эстеликли медаль. Онынъ ярасыклыгы – шоьл шешекейи (ромашка). Ол аьвелгиден алып Россияда суьйим белгиси эсабында саналган.
Россия элимиз бойынша Савлайроссиялык Аьел, суьйим эм алаллык куьни кенъ байрамшыланады. Коьплеген калаларда эм авылларда ерли власть органларынынъ эм ямагат организацияларынынъ куьши мен туьрли байрам эм шатлыклы шаралар озгарылады – концертлер, выставкалар эм конкурслар, коьп балалы аьеллерди, 25 йылдан артык заман бирге яшаган эр мен кыскаяклыды алгыслав эм с.б. Яслар арасында мунавдай ийги нышан да орын табады: сол куьн аьел курылса, ол савлай яшав оьмири узаклыгына сакланады эм наьсипли болады.
Аьдетке кирген коьплеген калаларда эм регионларда «Мага яшав савкатла» деп озгарылатаган информациялык-ярыкландырув акциясы да. Бу куьнде, аьел мен бирге йыйылысып, оьз ювыклары акында айырым каьр шекпеге ийги эп болады. Аьел агзалары арасында суьйим эм алаллык болган аьеллер – наьсиплилер санында. Ондай аьелде – ата патшалыгы, ана дуныясы эм бала еннети.