Ногай районында РФ Конституциясына туьрленислер киргистуьв бойынша тавыс беруьв болып озды. Ногай районынынъ Хатын-кызлар советининъ председатели Асият Манкаева 1201-нши номерли А.Джанибеков атындагы мектебиндеги сайлав участогында тавыс беруьвде катнаскан.

«Мен аьелди эм балаларды патшалык коршалавы акындагы Россия Федерациясынынъ Конституциясына киргистилген энъ
де маьнели туьрленислерине тавысымды бердим. Аьр бир элдинъ келеектегиси – ол балалар. Олар оьскенде элининъ гражданлары болаяклар.

«Аьелди, аналыкты, аталыкты эм балалыкты коршалав; тек эр киси эм хатын биргелесип аьел туьзбеге болувын коршалав;
аьелде балаларды тийисли кепте тербиялав уьшин, солай ок ясы еткен балалар атааналары акында каьр шегуьв борышын толтырмага аьллер туьзуьв». Бу тувыл ма патшалыктынъ энъ де маьнели байлыгынынъ, элимиз тапшырылып калдыраяк несиллер акында каьр шегуьв», – деп оьз ойы ман Асият Манкаева «Шоьл тавысы» республикалык газетасынынъ корреспонденти мен боьлисти.
Солай ок ол Ногай районынынъ хатын ларын сайлав участокларына келип, оьз тавысларын бермеге шакырды.

Асият Манкаевадынъ айтувы ман, ол тавыс берген участогында саклык яктан баьри керекли затлар болган.

Эсинъизге саламыз, тамбыз айдынъ 25-нши куьнинде савлай элимизде РФ Конституциясына туьрленислер киргистуьв бойынша савлайхалклык тавыс беруьв барды. Тавыс беруьвдинъ ызгы куьни шилле айдынъ 1-нши куьни деп билдирилген эди. Коронавируслы инфекциядынъ пандемиясыман байланыста тавыслав бир юма узагына оьтти.