Кырк кийик айынынъ 19-ншы куьнинде савлай элимиз бойынша биргелес тавыс беруьв куьни озаяк. Соны ман байланыста Дагестан Республикасынынъ куллыгын кесек заманга юритуьвши Сергей Меликовтынъ етекшилеви астында регионда сайлавларды аьзирлев эм озгарув соравы бойынша тамамлав кенъес оьтти.

Республика басы кенъести буьгуьнлерде дуныядан кешкен согыс генералы, Россия Федерациясынынъ Кубыла федераллык округында алдынгы толы ыхтыярлы ваькили Виктор Казанцевтинъ эстелигине бас ийуьв такыйкадан баслады.
Сергей Меликовтынъ айтувына коьре, республикада сайлавларды оьткеруьв бойынша уьйкен куллык этилген. Аьзирлик коьруьвде ярдам этуьв бойынша туьзилген куьп токтамастан ислейди. Регион басы уьстимиздеги айдынъ 16-ншы куьнине сайлавларды оьткеруьв бойынша ислейтаган баьри учреждениелер эм организациялар сайлавларга аьзир болмага кереклигин белгиледи. Кенъес катнасувшыларына Сергей Меликов сайлавлар ашык, аьдил, закон бойынша оьтпеге кереклигин талаплады.
– Биз республикамыздынъ гражданлары оьз эрки мен сайлав эткени уьшин баьри амалларды коьрмеге керекпиз, сондай аьллерди аьжетсизлев керекли болады, – деп тамамлады кенъести Дагестан Республикасынынъ Аькимбасынынъ куллыгын кесек заманга юритуьвши Сергей Меликов.