Заманлар каты агын кимик, ярык тезлиги мен озып барадылар. Аьдемлердинъ яслай оьсуьвин, оьрленуьвин, олардынъ коьп затларга етисуьвин коьрсенъ, сол затлар сенинъ коьз алдынъда болатаган болса, кайтип суьйинмейсинъ.
Мен Бекмурза Кудайбердиевти оьзим мектебте окыган йылларымда таныдым, биз бирге Терекли-Мектебте аьрекет этетаган балалар лагеринде (эсимде 1992-нши йыл эди) тыншаюв куьнлерди озгардык. Ушынын айтсам, куьплеримиз баска эди, ама досласувымыз сол заманларда бек йылы болды. Туьрли ойынлар да ойнаганмыз, шараларда да катнаскан эдик. Лагерьден кайтканнан сонъ да, Ф.Капельгородский атындагы паркында сонда бирге болган балалар ман бир кере йолыгыстык, Владимир Уразакаевке барып, суьвретке де туьскенмиз. Заманлар оьттилер, мен бактыма коьре, Ногай район орталыгы Терекли-Мектебке келип калдым. Ис аьрекет, аьел… Баьри де мунда кепленди.
Бекмурза да сайлаган кесписине, тувган юртына алал увыл болып кайтты. Ол, заман ман бирге абытлап, коьплеген яслардай болып, тувган ериннен кетип калмады. Савлай яшавын оьзининъ ногай халкынынъ маданиятын оьрлендируьвге багыслап келеятыр. Буьгуьнлерде ол оьзининъ 40 йыллык мерекесине дейим коьп затларга етискен деп ойлайман.
Ол – кишкейлей анъ дегенди эситип келген аьдем. Ол, яратувшылык пан каьр шегип келетаган, халкымыздынъ коьрнекли, талаплы артистлерининъ бириси, атаклы композитор Яхъя Таймасхан увылы Кудайбердиевтинъ аьелинде тувып-оьскен. Сол да ога сайлаган кесписинде уьлисин коскан болар.
Бекмурза Кудайбердиев А-Х. Джанибеков атындагы орта мектебин окып кутарганнан сонъ, Махачкаладагы Г.Гасанов атындагы музыкалык окув ошагына туьседи. Сол йылларда оны Дагестан Республикасынынъ айтылган педагоглар окытканлар. Сол окув ошагын уьстинликли окып битиргеннен сонъ, Астрахань каласындагы патшалык консерваториясында билимин арттырмага окувга туьседи. Студент йылларында Бекмурза Яхъя увылы ямагат аьрекетинде белсен катнасып келди. Бу куьнлерде де онынъ сол касиети калмайды. Ол Астрахань каласында окыйтаган заманларда «Эдиге» ногай маданият яслар орталыгынынъ ямагат организациясынынъ вице-президенти болып сайланган. Ол – дайым оьзининъ ойын билдирип болган, керек ерде миллетининъ менлигин айтып билген яс йигит.
Бекмурза Кудайбердиев он йылдан артык заман бек яваплы етекшилев исин юритип келеди. Буьгуьнлерде ол Ногай патшалык саз алатлар оркестрининъ художестволык етекшиси болады. Сол йыллар ишинде ол республикамыздынъ ямагат яшавында белсен катнасатаганы уьшин Дагестан Республикасынынъ Ямагат палатасынынъ грамоталары ман савгаланган.
2015-нши йылда ногайымыздынъ йигерли йигити Бекмурза Дагестан Республикасынынъ Аькимбасынынъ сенимли аьдемлерининъ Советининъ туьзилисине кирген. Ол яс заманларыннан алып спорт пан да каьр шегип келеди. Оьзининъ билдируьвине коьре, ол яс заманларында тайский бокс пан, аьли ногайымыздынъ асыл спорт кеби – атшабыс пан каьрлейди.
Туьрли регионлардан ногайлар катнасып озгарылатаган «Шоьл баьтирлери» деген эркин куьрес турнири де Бекмурзадынъ ойы ман 2007-нши йылдан алып озгарылады.
Бекмурза Кудайбердиевке мен буьгуьн тек уьстинликлерди, етискенинде токталмай, аьли де алдыга барганды йорайман. Сенинъ кеспи сайлавынъда атанъ Яхъя Таймасхан увылы Кудайбердиев коьрим болган болса, сен оьзинънинъ увылынъ ман, кызынъа тирев эм коьрим болганды йорайман.
Коьп болсын ногайымызда сендей яслар, Бекмурза!
Хайырлы мереке болсын!
Г.Курганова.
Суьвретлерде: Б.Кудайбердиев; Ногай патшалык оркестрининъ ис коллективи.
