Тезден савлай элимиздинъ медицина куллыкшылары кеспи байрамын карсы аладылар. Тамбыз айдынъ уьшинши каты куьни йыл сайын календарьде сол байрамды белгилейди. Байрам алдында, газета бетлеринде ийги куллыкшыларды белгилев, аьдетке кирип туры. Сол да ийги аьдет деп ойлайман, неге десе оьз исине алал, куллыгын йогары дережеде юритпеге суьетаган инсанлардынъ акында баьриси де билмеге керек. Врачлар сондай касиетли болганлары, боьтен де аьруьв, олардынъ янъылысларыннан аьдемнинъ яшавы уьзилмеге болады, ама олар куллыгына мукаят, билимли болса, авырувлылар тез ийги болып кетедилер. Аьдемнинъ яшавын куткарув – ол уьйкен баьтирлик.
Зафира Эсманбет кызы буьгуьнлерде Ногай район больницасынынъ бас врачынынъ эмлев иси бойынша орынбасары болып ислейди. Бу йогары дережели ис деп ойлайман, сондай дережеге етисуьв уьшин неше йыллар ийги этип ислемеге, оьз билимин тек арттырып калмай, куллыгында кулланмага, авырувлыларга йылы соьз тавып, ийги этип карамага керекли деп эсиме келеди. Менимше, Зафира Эсманбет кызы – сондай врачлардынъ бириси.
Зафира Куруптурсунова Дагестан медициналык академиясында 1988-1994-нши йылларда окыган. Махачкала каласында бир йыл узагында «акушерство-гинекология» кесписи бойынша интернатурасын да оьткен. Окувын биткен заманнан алып бу куьнлерге дейим врач-кыскаяклы Ногай район больницасында ислейди. Баслап акушер-гинеколог болып ислейди, сонъында район бойынша акушер-гинеколог болып туьсти, сол ерде 10 йыл узагында куллык этти. 2019-ншы йыл Екатеринбург каласында «Косымша медициналык билимлендируьв орталыгында» кесписин оьстирип, «Ден савлык саклавды эм ямагат савлыкты уйгынлав» кесписи бойынша ислемеге болады деген ыхтыяр алды.
Зафира Эсманбет кызы оьз кеспи усталыгын, билимин арттырув ниет пен элимиздинъ туьрли ерлеринде окувлар оьтеди. Сол алган билими, сулыбы ога исин йогары дережеде бардырмага амал береди. Онынъ айтувына коьре, врач бир ерде токтап турмага ярамайды, аьлиги заман йогары технологиялар заманы болганга коьре, баьриси де, боьтен де врачлар, сол заман ман бирге абытламага керекли.
– Куьндегилик исинде Зафира Эсманбет кызы оьзин билимли врач деп коьрсетип келеятыр, ол аьдемди тынълап, пайдалы маслагат бермеге болатаган инсан. Авырувлыларга тувыл, аьр бир аьдемге ярдам этпеге аьзир деп биледилер оны таныганлар. Билимли врач керекли ерде адаламай, дурыс карар алып болады. Оьз исин йогары кеспи дережеде юритеди: яваплылык пан карайды исине, оьзиннен де, куллыкшылардан да ийги этип ислевди талаплайды, куллыгын заманында эм сапатлы этеди, – деп айтады онынъ акында Ногай район больницасынынъ бас врачы Фаризат Янибек кызы Межитова.
Врачларда каты куьн де, юма сонъгы куьн де йок экенин баьримиз де билемиз. Соьйтип, Зафира Куруптурсунова да ислейди. Болады заманлар, кыйынлы авырувлы болса, бир неше куьнлеп больницада калмага туьседи. Зафира Эсманбет кызы коллектив пен тил тавып болады, кайдай аьллер де болып калады, ол аьр бир аьдемди тынълап, анъламага шалысады. Озган йыл баьримизге де айлак кыйынлы болды, оьзлерининъ кеспи усталыгын, аьдемшилик касиетлерин сол куьнлерде медицина куллыкшылары коьрсеттилер. Пандемияга аьзирлик коьруьвдинъ эм биринши коронавируслы авырувлыды аянлаган куьниннен алып Зафира Эсманбет кызы оьзининъ кеспи эм инсан касиетлерин коьрсетип иследи. Ол орта, киши медициналык персоналды эм врачларды аьзирлев дерислерин озгаратаган эди, куллыкшыларды тек кеспи яктан тувыл, психология ягыннан да яман мараз бан куьресуьвге аьзирлейтаган эди, больницады заманында керекли дарманлар ман, байыр коршалав амаллар ман аьжетсизлев уьстинде коьп куллык этетаган эди. Сол куьнлерди Зафира Куруптурсунова бир де мутпаяк, неге десе куьн сайын тувыл, сол заман секунда сайын яман мараз бан аьр аьдемнинъ яшавы уьшин куьреспеге туьсти. Сол куьнлерде эмлев бойынша бас врачынынъ орынбасарынынъ «кызыл зонада» ислейтаган медицина куллыкшылары ман бирге уйкламай, ашамай турган заманы болды. Ол баьри затты да ойлайтаган эди – авыр авырувлылар республика больницаларына йиберилдиме, «кызыл зонадагыларга» ас уйгынландыма эм сондай коьплеген соравлар.
Зафира Эсманбет кызы авыр туратаган кыскаяклы, коьп соьйлемес, оьзининъ акында да коьп айтпага суьймеди, мага коьре, газетага язылаягын да коьп макул коьрмеди, сол касиетлер ога ата-анасыннан коьширилген болса ярайды. Эсманбет Оразбай увылы эм Сайдат Исмаил кызы Куруптурсуновлардынъ аьели районда куллыксуьерлиги мен, оьзденлиги эм танълыгы ман коьримли аьеллердинъ санына киреди. Мен ойлайман, сондай куллыксуьер эм оьз исине яваплылык пан карап олар аьвлетлерин де уьйреткенлер.
Меним билдируьвимде янъылыс болмаса, Зафира Эсманбет кызы кеспи байрамы ман бирге оьзининъ мерекели тувган куьнин де карсы алады. Мен ога, онынъ ата-анасына, ювыкларына, кызы Дианага эм йиени Мухаммадка баьри ийгиликлерди де йорайман. Кыскаяклыдынъ оьзине айырым исинде уьстинликлер эм уьйкен хатын наьсипти сагынаман.
Г.Бекмуратова.
Суьвретте: З.Куруптурсунова.
