Оьткен юмадынъ басында «Ногайский район» МР администрациясында болган йыйында, район активи алдында оьзлерининъ ис аьрекетлери бойынша «Ногайский район» МР администрациясындагы каравсыз калган балаларды коршалав эм ерлестируьв ислери бойынша специалисти, Балалар яратувшылык уьйининъ етекшиси 2021-нши йылда этилген куллыкларынынъ эсабын берип кеттилер.
ООиП тамада специалисти Лейла Аджиковадынъ билдируьвине коьре, оьткен 2021-нши йыл эм 2022-нши йылдынъ доьрт айы ишинде ол аьрекетин бардыратаган боьлик пен аз куллыклар этилмеген. Боьтен де уьйкен маьне РФ Президенти Владимир Путиннинъ буйырыгына коьре, Сирия-Араб Республикасыннан кайтарылган балаларга бериледи. Буьгуьнлерде бизим районымызда Сирия ериннен кайткан 9 бала эсапка алынган, олардынъ 5-ви боьликтинъ коршалавы астында турады. Онынъ билдируьвине коьре, солай ок, турак-уьй сатылганда, ясы етпегенлерге пай шыгарылувы ман байланыслы бир неше аьризелер каралган. Боьлик куьн сайын соравлары ман келген гражданларды кабыл этип алатаганын да ол билдирди.
Балалар яратувшылык уьйининъ етекшиси Людмила Темирбековна Аракчиева болса, ол аьрекет этетаган организациядынъ бас борышы – балаларга толтырма билимди беруьв экенин айтып кетти. Аьли уьшин Балалар яратувшылык уьйинде сегиз туьрли биригуьвлер бойынша балалар каьрлейдилер. Аьр бириси бойынша балаларымыздынъ уьстинликлери болады. Олар, республика кезегинде оьткерилетаган шараларда катнасып, савгалы орынларга да етиседилер.
Мунда ис аьрекетин бардыратаган окытувшылар да оьзлерининъ кеспи усталыгын оьстируьв уьстинде ислейдилер. Айтпага, бу окув йылда доьрт окытувшы аттестация оьтип, йогары категорияга тийисли болдылар, бир окытувшы «Россия Федерациясынынъ ярыкландырув эм тербиялав бойынша сыйлы куллыкшысы» деген атка тийисли болды.
Балалардынъ яратувшылык уьйининъ ис аьрекети оьрге барса да, мунда да маьселелер бар. Айтпага, Балалар яратувшылык уьйининъ меканында 1990-ншы йылларда ызгы кере ярастырув ислер юритилген, соннан бери мунда янъыртылган зат та йок.
– Мунда талаплы балаларга оьзлерининъ кызыксынувларын яшавга шыгарылмага мырсат бериледи, сога коьре, баьри ийги затлар да мунда болмага керек, – деген ойын билдирди Балалар яратувшылык уьйининъ етекшиси.
Йыйыннынъ барысында, эсап беруьвден баска болып, алдымызда белгиленип озган Енъуьв куьнин озгарувда белсен катнаскан организацияларынынъ етекшилерине эм куллыкшыларына Сый грамоталар тапшырылды.
Г.Курганова.
Суьвретте: С.Караяновка Сый грамота тапшырув мезгили.
