Халкымызда исин йогары дережеде толтырувын, намыслылыгын, яваплылыгын, билимин, эрклигин баскаларга коьрим этип салгандай аьдемлер йок тувыл. Сондай аьдемлер кайсы заманларда да болганлар. Аьли заманлар туьрли болса да, оларга коьрим болган ата-анасы, олар берген ийги тербия баска болмага ыхтыяр бермейди.
Баймагомед Ярлыкапов Ногай районынынъ япсарында орынласкан Уьй-салган авылында Амин (яткан ери еннетли болсын) эм Фатима Ярлыкаповлардынъ аьелинде тувган. Амин Казиевич Ногай районынынъ яшавшыларынынъ эсинде бек танъ, йогары аьдемшилиги болган, аьр биревге колыннан келген коьмегин этип келген, терен билимли куллыкшы болып сакланган. Фатима Янмурзаевна болса, яшавынынъ 50 йылын яс несилге билим эм тербия беруьв исине багыслаган сый-абырай казанган окытувшы. Ярлыкаповлар оьз балаларын кишкейлей, эткен исин биринши орынга салып, оларда шыдамлыкты шыныктырып уьйреткенлер.
Баймагомед Ярлыкапов (суьвретте) оьз ис аьрекетин Ногай районынынъ орманшылык хозяйствосында баслаган. Ол Дагестан патшалык университетининъ юридический факультетинде билим алган. Яс йигит иш ислер боьлигине ислемеге туьседи: бас деп Баймагомед Аминович – милиция участковыйы, сонъ Ногай районынынъ иш ислер боьлигининъ следователи, тагы да кадрлар бойынша етекшидинъ орынбасары болып ислейди. Сонынъ арасында прокуратура следователининъ исин де юритеди. Сулыплы куллыкшыды, етекшилиги яктан уьйкен сеним этилип, республикамыздынъ бас каласына ислемеге коьширедилер. Онда ол Дагестан Республикасынынъ кавыфсызлык службасынынъ управлениесининъ етекшисининъ орынбасары болып куллык этеди. Сонъ коьп йыллар узагына Ногай районы бойынша ОМВД полиция боьлигининъ етекшиси болып ислеген.
Кайсы ис орында да Баймагомед Ярлыкапов исин, намысын бас орынга салган. Аьр дайым да, кайсы аьллерде де ол оьзининъ тувралык йорыкларына алал болып калган. Элин, ерин явдан коршаламага туьскен заманларда да ол бириншилер мен бирге эрклигин коьрсеткен. 1999-ншы йыл республикамызга кыйынлык туьскенин УСБ куллыкшылары биринши болып эситип, яв ман куьреске турганлар сырасында Баймагомед Ярлыкапов та бар эди. Сол заманларда ол бу службада оперуполномоченный болып ислейтаган болган. Баймагомед Аминович оьзининъ кайда эм кайдай ис толтырып юргенин уьйиндегилерге билдирмейди. Ол хатыны Эльмира ман балаларын Терекли-Мектеб авылга йибереди, оьзи согыска кетеди. Хатыны авылга уьйине келип, эрин Ахтыга узак заманга командировкага кетти деп айтады. Баймагомед Аминовичтен, сол оьзгерислерден 23 йыл озган сонъ, бу куьнлерде сорайман, онынъ дайым куьлемсирев бийлеп туратаган юзи бирден мунълы, сувык болып, бир кесек заманга ол ойларга коьмилип, уьндемей калды. Сол аьсерде онынъ коьз алдына сол кан тоьгисли куьнлер, отта янган бактылар келген болар деп ойлайман.
– 1999-ншы йылдынъ август айынынъ ызында савлай УСБ управление куллыкшылары Дагестан Республикасы бойынша МВД косымша отрядлары сырасында, солай ок саклав взводынынъ 15 куллыкшысы эм 5 коьлик айдавшылар Чабанмахи эм Карамахи авылларына шыгып кеттилер. Сонъ мени оннан Новолакка йибердилер. Онда болса мен командировкада йылдынъ ызына дейим болдым. Аьллер авыр эдилер, биз соны баслап, ерине етпей билмедик. Кайдай аьллерге калсак та, кайтип кыйын болса да, Дагестан Республикасынынъ бирлигин эм бойсынмаслыгын дагестаншылар якладылар. Сол оьзгерислерде Ногай районыннан тек эки аьдем катнаскан: мен эм Эльмира Юнусовна Кожаева. Бу хатын сонда оьзининъ журналист борышын баьтирлерше толтырды, – дейди Баймагомед Ярлыкапов.
Савлай элимизге кыйынлы йылларда коьрсеткен баьтирлиги уьшин Баймагомед Ярлыкаповка Россия Президенти Владимир Владимирович Путиннинъ указы ман «За отличие в охране общественного порядка» медали тапшырылган. 2009-ншы йыл ога «10 лет разгрома международных бандформирований» деген медали берилди. Ол «Россия Федерациясынынъ ыхтыяр саклав органларынынъ сыйлы куллыкшысы» деген атты казанган.
Баймагомед Ярлыкапов Ногай районы бойынша ОМВД полиция боьлигининъ етекшиси болып ислеген йылларда онынъ етекшилиги мен бек коьп кыянатлыклар шешилген. Аьлиги заманда Баймагомед Ярлыкапов Ногай район аькимбасынынъ орынбасары исин юритеди. Бу исте де ол оьз тувган ерине пайдалы болмага шалысып куллык этеди.
Янъыларда Баймагомед Ярлыкапов оьзининъ 60 йыллык мерекесин белгиледи. Биз ога аьр дайым да таза аспанды, берк ден савлыкты, куьннен-куьнге сый-абырайы оьскенин, кардаш-ювыкларынынъ суьйими ога аьр дайым да куьш-куват берип турганды йораймыз.
Н.Эрежепова.
