Ногай халкымыздынъ ваькиллери, элимиздинъ эм шет эллерининъ туьрли муьйислеринде яшаса да, халкынынъ атын коьтеруьв мыратта туьрли тармакларында куллык этип, бийик етимислерине етисип, оьз билими мен, эткен ис аьрекети бойынша сый казанып, оьз миллетининъ атын баскаларга танытып, халктынъ тилин, маданиятын, тарихин, саниятын оьсип бараятырган несиллерининъ юреклерине синъдирмеге шалысып келедилер.
Сондай алал исин – саьбийлерде тувган тилге суьйимди тербиялап келгенлердинъ бириси болады Дагестандагы Главсулак авылыннан Зульмира Абдулбакиевна Гасанова. Билимлендируьв тармагына йолды Зульмира 1993-нши йыл Буйнакск педагогикалык училищесин тамамлаган сонъ алды. Окувын битирип, ол Махачкаладынъ округына киретаган Главсулак авылынынъ 21-нши номерли мектебинде баслангыш классларында ис аьрекетин баслайды. 2010-ншы йыл Зульмира Абдулбакиевна йогары билим алув мыратта Дагестаннынъ патшалык университетининъ филология боьлигине туьсип билим алады. Коьп кетпей, Зульмира Гасанова йогары классларында орыс тилин эм адабиатын, а баслангыш классларынынъ окувшыларына тувган ногай тил эм адабиатын уьйретип баслайды. Ана тилиннен дерислерди баславга кыскаяклыга мектеб етекшиси ногай миллетли Элеонора Забитовна Искакова маслагатын берди. Сол ой яшавга айланаяк заман да келди.
Коьп кетпей, Зульмира Абдулбакиевнадынъ етекшилиги мен ногай миллетли саьбийлер ана тилининъ сыхырлыгына уьйренип басладылар. Ана тилинде дерислерди баслав коьп маьселелери мен байланыслы эди: бас деп окув китаплери, дериске кулланма амаллары керек эди. Коьп кетпей, окытувшыга Кизляр районындагы Огузер авыл яшавшысы Рашид Сунчалиев оьз демевлигин этти. Ол балаларды эски болса да, ана тилиннен окув китаплери мен канагатлавда ярдамласты. Соьйтип, онынъ излевлери, табувлары аркалы окувшылар ногай шаирлерининъ, язувшыларынынъ яратувшылыгы ман, ногай тилининъ тарихи, маданияты, санияты ман танысып басладылар. Окытувшы ана тилинде туьрли шаралар, байрамлар озгармага шалысады. Онынъ окувшылары ногай тилинде ятлавларды окымыслы окып, йырларды усташа йырлайдылар. Эгер алдын олар ана тилинде орысша катыстырып соьйлеген болсалар, эндиги таза ногай тилинде окып та, язып та боладылар. Онынъ окувшылары Бийке Кулунчаковадынъ яратувшылыгына, йыл сайын увыт айынынъ 21-нши куьнинде озгарылатаган Халклар ара ана тилининъ куьнине багысланган шараларда эм баска байрамларда белсенли катнасып, ногай тилинде ятлавлар яттан окыйдылар. Олар Махачкаладагы Дагестан РГВК-дынъ ногай тилинде телеберуьвининъ сыйлы конаклары да болганлар.
Коьп йыллар бойы билимлендируьв тармагында яваплы иси уьшин Зульмира Абдулбакиевна Сый грамоталарына эм ДР отличниги деген сыйлы атына тийисли этилген.
Зульмира Гасановадынъ келеекте де балалардынъ аьр бирисине ана тилин уьйретуьвде, оны яны ман суьйдируьвде этеек коьп ойлары, мыратлары бар.
Ак ниетли окытувшыга сол мыратты яшавга шыгарувда ашык йолды, кайсы баславда да бийик етимислерди сагынаман.
Г.Нурдинова.
Суьвретте: Зульмира Гасанова оьз окувшылары ман.
