Янъы окув йылынынъ алдында Ногай район администрациясынынъ кенъеслер залында йыл сайын август айында оьтетаган педагогикалык куллыкшыларынынъ конференциясы озды.

Сонынъ исинде «Ногайский район» МР администрациясынынъ аькимбасы Джамалутдин Эсиргепов, онынъ орынбасары Баймагомед Ярлыкапов, билимлендируьв боьлигининъ етекшиси Алтын Агаспарова, Ногай районы бойынша профсоюз организациясынынъ председатели Насипхан Джумаева, мектеблер етекшилери, окытувшылары эм баскалар катнастылар. Бас деп йыйылган окытувшыларды янъы окув йылы ман Джамалутдин Эсиргепов йылы хошлап, кутлады. Ол Ногай районынынъ етекшилеви билимлендируьв тармагына айырым эс этилеегин билдирди. Сонъ Алтын Агаспарова «2021-2022-нши окув йылында Ногай районынынъ муниципаллык билимлендируьв тармагынынъ аьрекетининъ иштелиги эм янъыртылган ФГОС киритилген аьллерде сонынъ оьрленуьвининъ абырайы» деген докладын кенъес катнасувшыларына окып эситтирди. Соьйтип, йыйылганлар туьрли район, республика эм савлайроссиялык кезегинде оьткен конкурсларда енъуьвши болган окытувшылардынъ, тербиялавшылардынъ эм окувшылардынъ атларын тагы да эситтилер. Ногай район билимлендируьв боьлигининъ етекшиси балалар бавларын ийгилендируьвди куьткен аьллер акында да айтып озды. Солай ок ол туьрли сабаклар бойынша ЕГЭ сырагыларында токтады. Онынъ соьзлери мен, ызгы бир неше йыл узагына, бизим районнынъ выпускниклери орыс тили бойынша сынавларда ийги сырагылар коьрсетедилер. Бу сабак бойынша сынавларда олар коьрсеткен сырагылар республика муниципалитетлери сырасында энъ де ийгиси эм Махачкаладан сонъ экинши болады. Экинши парызлы сабагы – эсап бойынша сынавлар сырагылары да ийги болган. Ызгы йыллар ишинде, быйыл, биринши кере, эсап бойынша сынавдан оьтеялмаган окувшылар йок эди. Алтын Агаспарова окувшылардынъ патриотлык тербиялавы, олардынъ язгы тыншаювы акында да айтпай калмады. Оьз соьзининъ сонъында Алтын Даутовна ийги сырагыларга етисуьв уьшин, келеяткан окув йылында окытувшыларга кайдай борышлар толтырув керегин белгиледи. Оннан сонъ Орта-Тоьбе авыл мектебининъ етекшиси Сапиет Межитова «Аьлиги заманнынъ яратувшылык негизинде ойлайтаган, эдаплык яктан тербиялы, дени сав инсаннынъ мектеби» деген темага докладын окыды. Ногай район билимлендируьв боьлигининъ методисти Секерхан Оразбаева «2026-ншы йылга дейим Ногай районынынъ билимлендируьв организацияларында билимлендируьв сапатын оьстируьв бойынша билимлендируьв боьлигининъ шаралар планын яшавга шыгарувы акында хабарлады. Куьнбатар авыл мектебининъ етекшисининъ тербиялав иси бойынша орынбасары Канитат Кокеева мектебте окувшылар эм окытувшылар ман идеологиялык тербиялав исининъ баскалыкларында токтады. Билимлендируьв боьлигининъ методисти Мадина Кусегенова «Меним мектебим» федераллык патшалык билдируьв тармагынынъ киритилуьви акында аьзирлеген докладын окыды. Окытувшылар конференциясында кабыл этилинген резолюцияды Калинин авыл мектебининъ етекшиси Эльмира Аджекова окыды. Конференция сонъында уьстинликлерге етискен окытувшыларга эм балалар бавларынынъ тербиялавшыларына Ногай район администрациясыннан Сый грамоталар ташырылды. Солай ок Алтын Агаспарова «ДР билимлендируьв тармагынынъ алдышысы» деген коькирек белгиси мен савгаланаяк окытувшылардынъ атларын билдирди. Олар – Зафира Алыпкашева, Янибек Динашев, Арслан Бакиев, Эмре Елакаев, Асанали Бекмурзаев, Насият Абдулгапова, Асхат Акмурзаев, Бурлиянт Саитова. Окытувшыларымыздынъ етимислери акында эситип, биз Ногай районы республикамызда билимлендируьв бойынша алды орынлардынъ бирисинде экенин анълаймыз. Ол – бизим баьримизге де куьез эм оьктемлик. Янъы окув йылы алдында аьр бир мектеб, етискен уьстинликлерде токтамай, алдыга карап абытламага борыш алсын. Н.Кожаева.

Суьвретте: окытувшылар конференциясыннан коьринис.