«Владимир Владимирович Путин Россия Федерациясынынъ Президенти болып куллык эткен шаклы, онынъ оьзининъ айтувына коьре, бир россия аьдеми де амал болып, Сирия еринде калмага керек тувыл», – деп баслады оьзининъ соьзин Ногай районынынъ администрациясында йолыгыска келген Дагестан Республикасынынъ Аькимбасындагы аьел, аналык эм балалардынъ ыхтыярларын коршалав бойынша уполномоченныйы Марина Юрьевна Ежова.
Буьгуьнги йолыгыска Ювыктагы Куьнтуварга экстремистлик аьрекетин бардырмага кеткен яслардынъ ювыклары келдилер. Бу шарада Марина Ежовадан баска болып, «Ногайский район» МР администрациясынынъ аькимбасынынъ орынбасары Б.Ярлыкапов, Дагестан Республикасынынъ Муфтиятынынъ Ногай районы бойынша ярыкландырув боьлигининъ етекшиси М.Муллаев ортакшылык эттилер.
Йолыгыстынъ бас темасы – Сирия ерине экстремистлик аьрекетин бардырмага кеткен яслардынъ балаларын оьз элимизге кайтарув йорыкларын анълатув эди.
Марина Ежовадынъ айтувына коьре, оьз балаларын кайтарар уьшин бизим атай-тетейлер, ювыклар кайдай аьллерге де туьседилер, коьп ерлерде алданувлар да боладылар.
Марина Юрьевна оьз соьзинде Россия аьдемлерининъ етим калган балаларын тувган юртына еткеруьв уьстинде кайдай йорыклар тутылмага кереги акында анълатып айтты. Аьли уьшин сол аьрекет уьстинде белсен куллыклар республикамызда этиледи, бу ерде ол анълатып кетти, сол балаларды еткеруьв уьшин аз карыж шыкпайды, баьри финанс яктан шыктаж федераллык бюджеттен болатаганын.
– Баслап, Сирия ерине кеткен ювыклары бар аьдемлер, сонда калган балаларын аькелмеге ниетлери бар болса, келип республикалык комиссияга аьризе язадылар, баьри керекли документлер йыйналганнан сонъ, ювыклардан, кан ювыклыгын белгилер уьшин, биоматериал алынады, заман созбас уьшин, сондай куллыклар Сирия еринде де бизим ваькиллер мен, дипломатлар ман этилинеди, оннан сонъ, ювыклык токтастырылды дегенде, балалар кайтувга аьзирленедилер. Мине келеятырлар деп, балаларды мунда ювыклары карап турадылар, ама сонда да кыйынлыклар туватаган ерлер боладылар. Айтпага, янъыларда бир аьелдинъ доьрт баласына баьри керекли документлер де аьзирленип, тувган юртка кайтады дегенде, бир абалары тоьбелесип, алып калган. Сондай аьллерге де аьзир болмага керек болады…», – дейди Марина Ежова.
Тувган юртка россия балаларын аькелуьв тыныш куллык тувыл, Дагестан Рес-публикасы РФ Президентиндеги балалар ыхтыярларын коршалав бойынша уполномоченныйы Анна Кузнецова ман, Ирак, Сирия, Турция, аьскер ведомстволарынынъ, савлык саклав, коршалав министерстволарынынъ ваькиллери мен коьп куьш саладылар эм сол исти олар эткенлери уьшин акша алмайдылар. Сол куллыклар баьриси де патшалык ярдам ман, кезекли аьлде этилинеди.
Марина Ежовадынъ анълатув хабарын тынълаганнан сонъ, йыйылганлар оьзлерин кызыксындыратаган, оьзлери анъламаган ерлерин белгилеп, соравларын бердилер. Олардынъ сол ерлерге кеткен балаларыннан калган балалар кайсы ерлерде экенлерин айтып, соларды кайтарув йорыклары акында соьйледилер.
Г.Сагиндикова.
