6 ястан алып 18 яска дейим балалардынъ ата-аналарына патшалык бир кере берилетаган 10 мынъ маьнет акша оьлшеминде тоьлевлер береди. Буьгуьнлерде мектебте окыйтаган балалары бар аьеллерге бу тоьлев – салдарлы коьмек, неге десе ата-аналар коьп акша мектеб кийимине эм окувга керекли затларга шыгарадылар. Бу сорав бойынша оьз ойы ман Терекли-Мектеб яшавшысы, коьп балалы ана Зейнаб Башантавова боьлиседи.
– Мен патшалыкка сондай бир кере тоьленетаган косымша тоьлев бергенине разылыгымды билдиремен. 10 мынъ маьнет акша – ол аз акша тувыл, балаларга окувга керекли затларды алмага бу косымша коьмек. Бизим аьелде мектебке 3 бала барады, олардынъ экеви уьйкен классларда окыйдылар. Окув йылы алдында биз аьр балага кийим, тептер, калем, дневник эм сондай баска затлар аламыз. Мен ойлайман, аьр аьел сондай коьмекке буьгуьнлерде суьйинип турады, неге десе саьбийлерин мектебке аьзирлемеге кыйналатаган аьеллер де бар. Мектебке биринши класска баратаган балаларга да бу тоьлев – ийги коьтергишлев. Меним соьзлериме коьплеген ата-аналар макул болар деп ойлайман, – деп айтты «Шоьл тавысы» республикалык газетасынынъ хабаршысына коьп балалы ана.
