Янъыларда «Ногайский район» МР администрациясында болган йыйында эки сорав каралды. Биринши сорав «Ногайский район» МР администрациясындагы КЦСОН куллыкшылары ман уйгынланатаган социаллык куллыклар бойынша сол ок организациядынъ етекшиси Г.Капитуллаева эм экинши ер соравы бойынша «Ногайский район» МР администрациясындагы УСХ-дынъ оьсимликлер бойынша алдышы специалисти Д.Аманиязов шыгып соьйледилер.
Бу куьн биринши сорав бойынша шыгып соьйлеген Г.Капитуллаева ясуьйкенлерде, сакат балалары бар аьеллерди социаллык яктан канагатлав бойынша туватаган кыйынлыклар акында да хабарлап кетти.
«Ногайский район» МР администрациясындагы КЦСОН етекшисининъ билдируьвине коьре, бир социаллык куллыкшы куьнде 9 буйымлар битиреди.
Аьли уьшин КЦСОН боьлигинде аьдемлерди олтырып карайтаган служба да аьрекет этип баслаган. Сол буйымлар белгиленген акша оьлшеми тоьленуьв эсабында бардырылады, бир саьат – 70 маьнет.
Оьз соьйлевинде Гульфира Капитуллаева 2018-нши эм бу йылдынъ ярым йылы ишинде этилген куллыклар тамамларын келтирди. Бу йыл ишинде олардынъ тармагынынъ алдына салынган патшалык борышлар 57 процентке толтырылганы акында айтылды. Соьйтип ис аьрекет бардырылатаган болса, йылдынъ ишинде олар алдыларына салынган борышларды арттырып та толтыраяклар.
Буьгуьнлерде «Ногайский район» МР администрациясындагы КЦСОН – Дагестан Республикасы бойынша энъ де ийги КЦСОН-лар ишинде.
Ис аьрекети бардырылатаган болса, етиспевликлер де, маьселелер де болмай болмайды, КЦСОН куллыкшыларында да ис аьрекетлери бойынша кыйынлыклар тувадылар. Бас деп тийисли шартлары ман меканларынынъ йоклыгы, бар алатлардынъ кулланув болжалы шыкканын белгилеп кетти.
Бир бес йыллар артта КЦСОН ишинде айырым медицина куллыкшысы да аьрекетин бардыратаган болган, буьгуьнлерде сол штат кесилген. Г.Капитуллаевадынъ айтувына коьре, буьгуьнлерде социаллык ярдам алатаганларга медициналык куллыкшылары керегеди.
– Баслап, ярдам алувшылар санына киргенлер бизде социаллык куллыкшылары ишинде медициналык кесписи болган куллыкшылардынъ колларына туьспеге шалысадылар. Сога коьре, сол алдын болган медициналык боьлиги кайтадан аьрекетин бардыратаган болса, бизге уьйкен ярдам болар эди, – деген ойын ол билдирди.
Экинши, Ногай район япсарларында авыл хозяйстволык маьнелиги болган ерлердинъ кулланувын ийгилендируьв бойынша шаралар эм тийиссиз кулланувды йибертпев сорав бойынша районымыздагы аьллер мен Д.Аманиязов йыйылганларды таныстырды.
Аьли уьшин кырда бизим район яшавшылары карбыз шашадылар, куллыклар кутылганнан сонъ, тийисли карыжлар да алганнан сонъ, калган пленкалар йыйналмайдылар, соьйтип табиатка да, ерге де зыян келтириледи.
Яз шакларда баьримизге де белгили, шегертки бизим оьсимликлерге кайдай йойым аькелетаганы. Солар ман куьрес кайтип юрилетаганы акында да ол билдирип кетти. Оьз соьзинде Д.Аманиязов аьлиги заманларда малдынъ коьплилиги акында билдирди. Буьгуьнлерде отлак ерлерди кулланув тийислиден 420 процентке артып барады. Солай болганда бизим ерлер кайтип кум-такырга айланмасын…
Йыйыннынъ ызында тынъланылган соравлар бойынша тийисли карарлар да алынмага токтасылды. Аьр бир соьйлевшиге оьз соравы бойынша маслагатлар да, соравлар да берилдилер.
Г.Сагиндикова.
