Меним буьгуьнги макаламнынъ бас келбети бизим аллы-ясыл шоьллигимиздинъ ала-куба кумларынынъ арасында ерлескен Червленные Буруны авылында тувып-оьскен. Ол оьзининъ киндик каны тамган авылындагы ерли мектебти уьстинликли окып битиргеннен сонъ, Сургут каласындагы политехнический окув ошагында окып, автокоьликлерди канагатлав эм ярастырув бойынша уста болып шыгады. Газета окувшымды айлак куьшли кыйнамай, армаганда кимнинъ акында соьз юреегин билдирейим, ол бизим яс йигит Ибрагим Ваис увылы Койлыбаев болады.
Ибрагим ногай миллетли ясларынынъ коьбисиндей болып, аьдетке келискен, эр кисиге тийисли тербияды алып келген йигит болады.
Ибрагим окув ошагын кутарганнан сонъ, эл алдында оьзининъ борышын толтырувга аьскер сырасына алынады. Сонынъ ишинде ол, тогыз ай аьскер сырасында бола турып, контрактлы службады оьтпеге ниетленип, кол басады. Онынъ соьйтип басланады ис аьрекети. Ибрагим элин коршалавга дайым аьзир. Ногай районынынъ Терекли-Мектеб авылында орынласкан аьскер боьлигинде ис аьрекетин бардырып турган заманларда, дурысынша, оьткен йылдынъ увыт айынынъ 6-ншы куьнинде Ибрагимди Карашай-Шеркеш Республикасына командировкага йибередилер (сол заманларда Украина еринде согыс спецоперациясы басланаяк болып туры эди), соннан кеткен бизим йигит Украина ериндеги согыс спецоперациясында катнаспага. Бес ай узагында Ибрагим элин коршалавда катнаскан. Онынъ оьзининъ билдируьвине коьре, Ибрагим туьзилисинде болган аьскер куьби япсарды коршалаган, явдынъ япсары ман оларды тек Ингулец йылгасы айырган. Ол сонда мергин исин бардырган.
Аьли Ибрагим Ваис увылы тувган-оьскен еринде болып, тынышлы яшавдынъ, аьдемнинъ оьмирининъ баасын анълайды. Сонда коьргени мен аьлиги яшавды тенълестируьв де керек тувыл экенин айлак аьруьв анълайтагандыр. Кыйынлык, согыс майданы, баьрине де кыйын. Боьтен де кыйын, согыста, аьлиги заманда оьтип турган согыс спецоперациясында катнасатаганларга эм катнасканларга…
Ибрагим Ваис увылы Койлыбаев «За боевые отличия» медали мен савгаланган. Эткен исинъ белгиленсе яман тувыл, ама баьрисиннен де уьйкен савга – сакланган яшав оьмиринъ.
Г.Сагиндикова.
Суьвретте: И.Койлыбаев.
