Яшавшыларды социаллык яктан канагатлав орталыгында Ногай районында ДР бойынша Россия Социаллык фондынынъ боьлиги мен биргелесте аьел, суьйим эм алаллык куьнине багысланып, бек ийги шара уйгынланды. Йолыгыста ДР Ямагат палатасынынъ агзасы, Хатын-кызлар район советининъ председатели Асият Манкаева, Ногай районында ДР бойынша Россия Социаллык фондынынъ етекшиси Мадина Абдулалимова, Ногай район КЦСОН-нынъ етекшисининъ кесек заманга куллыгын юритуьвши Марзиет Картакаева, КЦСОН орталыгынынъ балаларды эм балалы аьеллерди уьйлерине барып канагатлав боьлигининъ куллыкшылары ортакшылык эттилер. Шарадынъ конаклары СВО катнасувшыларынынъ аьеллери – Абдулбариевлер, Оразбаевлер, Оразаевлер эм яс, коьп балалы Колебаевлердинъ аьели болдылар. Йыйылганларды Марзиет Картакаева йылы хошлады. Ол суьйип, аявлап, баалап, каьр шегип аьдем аьелде уьйренетаганын белгиледи. Онынъ соьзлери мен, кайдай тербия бала уьйинде алса, сондай ямагат та болады.
Сонъ Асият Манкаева йыйылганларды конак аьеллер мен таныстырды: «Биз мунда уьлги болган, коьп йыллар узагына тил бирликте татым яшаган аьеллерди шакырдык. Бу ата-аналар оьз балаларына ийги тербия бергенлер, олар болса, аьли оьзининъ аьрекети мен районымызга, республикамызга, элимизге де пайда аькеледилер.
Озган 2022-нши йылдынъ кырк кийик айында Руслан эм Ислам Абдулбариевлер толы болмаган мобилизация бойынша согыс спецоперация озып турган ерге кеткенлер. Эки агалы-инили Элин коршалавга турдылар.
Каирбек эм Насият Оразаевлер былтыр «Алтын тойын» белгилегенлер. Эки кыз оьстиргенлер: Марипат–МВД куллыкшысы, аьли ГИБДД инспекторы болып куллык этеди, экинши кызлары Зарифат медучилищеде окыган.
Кайту эм Зарема Оразбаевлер быйыл бирге яшаганлы 25 йыл толувын белгилегенлер. Олардынъ эки кедеси бар – Арслан эм Нурлан. Кайту Оразбаев 20 йылдан артык заман аьскер аьрекетин бардырады. Контракт бойынша ислеп, ол бир неше ай узагына СВО озып турган ерде етекшилевдинъ борышларын толтырган. Аьли ол Ростов каласындагы аьскер боьлигинде взвод командири болып куллык этеди.
Залимхан эм Бриллиант Колебаевлердинъ аьели курылганлы 12 йыл болады. Олардынъ тунгыш кызы Роза «Дагестаннынъ яны» ДР Оькиметининъ баргысынынъ лауреаты, Роза эм Ясмина «Карлыгаш» биюв ансамблининъ катнасувшылары, Султан эркин куьреске юреди».
Мадина Абдулалимова аьелди эм энъ де ювык аьдемлер мен озгарган аьр бир такыйкады баалап билмеге маслагат этти. Тагы да ол патшалыктынъ коьп балалы, осал канагатланган аьеллерди социаллык тоьлевлер эсабында коьтергишлевлери акында айтты.
Берекетли сыпыра тоьгерегинде йыйылганлар оьзлерининъ ата-анасын эсине алдылар, оьзлери оьскен эм курган аьеллери акында хабарладылар. Насият Оразаева аьр дайым да аьелде эркек аьдемди сыйламага, онынъ айткан соьзин ерге туьсирмей толтырмага, соьйтип балаларды да тербияламага кереги акында айтты. Солай ок йолыгыс барысында аьлиги заман яслардынъ курган аьелининъ бузылувында шет-кырыйсыз оьктемликлери себеп болатаганы белгиленди. Аьел катнаслары эм наьсипли аьел туьзуьвининъ сырларыннан оьзгелей, бу куьн коьп соьзлер СВО катнасувшыларынынъ, олардынъ маьнели аьрекетининъ акында да айтылды.
– Бу кыйынлы заманларда биз баьримиз де бирге болмага тийислимиз. Эгер бизим увылларымыз СВО озып турган ерге кетсе, олар белгисиз бир ерлерге кетеди деп ойланманъыз. Олар Элин коршаламага турадылар. Оьмир бойы эр бала – Эл коршалавшысы. Бизим патшалыгымыз сондай карар алган болса, соны биз толтырмага борышлымыз. Россиядынъ Савытлы куьшлери мен Оьр Бас Командующийи Владимир Владимирович Путиннинъ алган карарын биз яклаймыз. Биз тек бир зат этпеге боламыз – СВО озып турган ерге увылларымызга посылкалар йибермеге, йылы хатлар язбага. Соны биз этип келеятырмыз. Бек коьп посылкалар йыйналып йибериледи», – деп оьз ойы ман Асият Бадиевна боьлиседи.
Шара сонъында конакларга гуьллер эм савкатлар тапшырылды.
Н.Кожаева.
Суьвретте: йолыгыстан коринис.
Аьр кайсымызга яшавда маьнели эм керекли
![](https://golosstepi.ru/wp-content/uploads/sites/7/sites/7/2023/07/-semi-29-e1689849696969-1024x468.jpg)