Ызгы заманларда «Омикрон» деген коронавирус маразынынъ янъы штамм эм онынъ яйылувы акында сав дуныяда айтадылар. «Омикрон» штаммы элимиз бойынша да яйылып келеди, буьгуьнлерде коьплеген регионлары бойынша айырым тыювлары киргистилгенлер.

– Юкпалы штамм уьйкенлерди де, балаларды да аямайды. Буьгуьнлерде авырыганлардынъ саны куьн сайын оьсип келеди. Мараздынъ баска толкынлары ман тенълестиргенде, авырыганлардынъ саны уьйкен, – дейди Ногай халк патшалык театрынынъ адабиат боьлиги бойынша етекшиси Рамзия Кайтарбиевна Шабанова.
– Аьлиги заманда ямагат ерлерде аз болмага шалысынъыз. Ол затты да дайым этип болмайсынъ, неге десе аьдемлерге куллыкка, окувга етпеге керек болады эм коьбисине ямагат коьлиги мен пайдаланмага туьседи. Ама аьр кимге де амал тавып социаллык дистанциясын ысламага, коьплеген аьдемлер бар ерлерден эрек турмага, маска такпага, дезинфекция амаллары ман пайдаланмага деген маслагатлары ман пайдаланмага керек.
Яйылув маразы тек авырыган аьдем уьшин тувыл, онынъ тоьгеректегилерине де коркынышлы экени савлайымызга да белгили. Аьр эки куьн сайын «Омикрон» штаммы ман зарарланганлардынъ саны оьсип келеди. Соны ман байланыста юкпалы маразы ман зарарланувды тоьменлетуьв ниетте районымыздынъ яшавшыларын вакцинацияды эм ревакцинацияды оьтпеге шакыраман. Оьзинъизди эм тоьгеректегилеринъизди сакланъыз! Ямагат ерлеринде маскасыз юрменъиз, – дейди Рамзия Шабанова.