Сыйлы хатын-кызлар!
Казан айынынъ 15-нши куьни савлай дуныяда авыл хатын-кызлар куьни деп белгиленеди. Сол да сейирли тувыл, неге десе авыл хатын-кызлары Ер юзинде яшавшылардынъ доьрттен бир пайы болады. Олар авыл районларында алдышы орынды тутадылар эм онынъ оьрленуьвине салдарлы уьлисин бередилер.

Районымызда етекши хатын-кызлар коьп, олар ямагат аьрекетине катысадылар. Мектеблерди, баьри балалар бавларды, райбольницады, маданият тармагынынъ учреждениелерин хатынлар етекшилейдилер. Патшалык эм муниципаллык службаларында бас эм алдышы специалистлер аьрекет этедилер – врачлар, окытувшылар, иш ислер органларынынъ, почта, медициналык эм социаллык куллыкшылары. Олардынъ исине коьре авыл яшавшысынынъ, эсли аьдемлердинъ ямагат эм патшалык акында ойы кепленеди.
Авыл яшавынынъ кайсы ягын да алып карасак, хатын-кызларды коьремиз. Олар авылхозяйстволык тармагында да ислейдилер. Ким болып ислесе де, бизим сыйлы авыл хатынлары оьз киели парызын мутпайдылар – уьй ошагын саклав эм ийги аьдетлерди келеектеги несилге коьшируьв. Мен буьгуьн кутлав соьзимди авылдынъ саклавшылары – хатын-кызларга каратаман. Сизинъ эткен исинъиз бен буьгуьн авылларымыз оьрленеди. Савлайдуныялык байрам ямагатка авыл хатын-кызлардынъ эткен аьрекети кайдай сыйлы эм маьнели экенин билдиреди.
Аьр бир куьнинъиз шатлыклы болсын, яшавынъыз наьсипке, ден савлыкка, онъайлыкка толсын, аьвлетлеринъиз, ян йолдасларынъыз сизге суьйиниш савкатласын.
А.Манкаева,
Ногай районынынъ Хатын-кызлар советининъ председатели.