Уьстимиздеги йылдынъ увыт айынынъ басында Ногай районынынъ Терекли-Мектеб авыл А.Ш.Джанибеков атындагы мектебининъ китапханасында ногай суьвретшиси Осман Суюндиковтынъ шыгармаларынынъ выставкасы уйгынланып оьтти.
Китапхана куллыкшысы Гульнара Агаспарова ман уйгынланган шарада 5-нши эм 8-нши класс окувшылары ортакшылык эттилер. Выставкага келген окувшыларга суьвретши оьз суьвретлерин кайтип ясап баслаганын, живописьтинъ туьрли йоллары акында, бояклардынъ туьрли туьслерин кайтип якпага керегин, оьз ислерининъ тарихи акында хабарлап эситтирди. Суьврет ясап оьнерли суьвретши бала шагыннан баслаган. Осман Индралиевич суьвретлерин сол колы ман ясайды, неге десе онъ колы бала шагыннан аьрекет этпейди. Суьвретши болмага деген мырады Осман Индралиевичте кишкей заманында тувган.
1978-нши йыл ол Махачкаладагы Джемал атындагы Дагестаннынъ художестволык училищесине туьсип, оны етимисли тамамлайды. Кеспи иеси оьз ис аьрекетин баслап суьвретлев дериси бойынша окытувшы болып баслап Нариман авылында, оннан сонъ Терекли-Мектеб авыл орта мектебинде баслаган. Сол йылларда ол яратувшылыгын оьстирип, суьвретлер ясап баслайды. 2009-ншы йыл оьзининъ район орталык маданият уьйинде биринши кере, оннан сонъ районнынъ тысында да, солай болып Махачкалада да выставкасын коьп кере уйгынлап озгарды. Аста-аста суьвретшидинъ оьнери акында туьрли республикалык газеталарынынъ бетлеринде язып баслайдылар, солай ок, онынъ ислери салынган выставкадан репортажлары республикалык телевидениелеринде коьп кере коьрсетилген. Мине 11 йыллар бойы Осман Индралиевич йыл сайын окытувшысынынъ, уллы ногай суьвретшиси Сраждин Батыровтынъ эстелигине оьз ислерининъ выставкасын уйгынлап озгарып келеди.
Солай болып, Осман Суюндиков 2020-ншы йыл биринши болып Дагестан ериндеги Сулакский каньонда уйгынланып оьткен халклар ара артсимпозиумынынъ катнасувшысы болды. Онда коьп ерлерден келген суьвретшилер мен танысты эм эки куьнлер ишинде онынъ «Окраина Гуниба», «Старое селение Гоор» деген эки суьвретлери дуныя ярыгына тувдылар. Буьгуьнлерде ногай суьвретшиси 200 шыгармаларынынъ авторы болады.
Шарадынъ барысында окувшылар уьйкен аваслык пан суьвретшидинъ яшав йолы, онынъ бай яратувшылыгы акында билимлерин оьстирмеге амал таптылар, Осман Индралиевичти тек мектебте оьз исин суьйген окытувшы деп те тувыл, ама ногай халкынынъ белгили суьвретшиси экенин де билдилер. Выставкада болган балалар онынъ келеектеги яратувшылык мыратлары ман таныстылар эм олар суьвретлердинъ аьр кайсысынынъ акында да маьне берип тынъладылар.
Шарадынъ сонъында окувшылар эм 8-нши класс етекшиси Марина Межитова кызыклы выставка уьшин уьйкен разылыгын билдирдилер эм суьвретшиге яратувшылыгында бийик уьстинликлер сагындылар.
Соьйтип мектеб китапханасында уйгынланган выставка йылы коьнъилде оьтти.
Г.Нурдинова.
Суьвретте: Осман Суюндиков китапханада оьткен выставкада.
