Социаллык куллыкшысынынъ иси бек авыр эм уьйкен яваплыкты талаплайды. Олар оьзлерин маьнели, аьдемлерге пайдалы эм керекли иске багыслап келедилер.
Социаллык тармагына Альбина Ебраиловна Агисова Дагестаннынъ патшалык педагогикалык университетининъ тарих боьлигин тамамлаган сонъ келди.
Биринши ис аьрекетин ол 2005-нши йылда социаллык иси бойынша специалисти аьрекетиннен баслаган. 2011-нши йылдан алып Альбина Агисова «Ногайский район» МО-сында КЦСОН-нынъ саьбийлерди эм аьвлетлери болган аьеллерди социаллык ягыннан канагатлав боьлигин етекшилеп келеди. Социаллык демевлиги керексинетаган саьбийлерге эм аьеллерге, колайсыз аьеллерге ярдамласув, саьбийлердинъ каравсызлык аьлде оьсуьвининъ, социаллык етимликтинъ алдын шалув – сол боьликтинъ бас борышларынынъ бириси болады. Буьгуьнлерде районымыздынъ 200-ден артык яшавшылары, аьеллери социаллык буйымларын алып, аьжетсизленип келедилер. Олардынъ сырасына коьп балалары болган, толы болмаган, сакат саьбийлери мен, аз канагатланган, колайсыз аьлде яшайтаган аьеллер киредилер.
– Социаллык куллыкшысы – ол биринши болып ярдамшы, психолог эм дос. Боьтен де авыр яшав аьллеринде болган аьдемлерге демевлик керегеди. Сол себептен ис аьрекетимиз бойынша туьрли аьдемлер мен тар байланыс тутпага туьседи. Кайсы аьлде де юрек юмартлыгынъ ман, дуныяга суьйдимли карамага тийисли. Боьлигимиз районымыздынъ ясы етпегенлердинъ ислери бойынша комиссиясы ман, ясы етпегенлердинъ ислери бойынша инспекциясы ман, Билимлендируьв управлениеси мен, савлыкты саклав тармагы ман байланыс тутып келеди. Мен етекшилейтаган боьликте оьз исин ийги билген кеспили специалистлери куллык этип келедилер.
Оьз ис аьрекетинде инновационлык йосыкларын кулланып, аьдемлерге ярдамласып, олар ман ортак тил тавып келген, кайбирерде сол аьдемлерге яшавда ялгыз тирев эм демевлик болып келген аьел мен куллык этуьв бойынша специалистлерин, айтпага, Ф.Зарманбетовады, Д.Бодениязовады, С.Эсиргеповады белгилемеге суьемен. Меним етекшилигим астында боьлик куллыкшылары саваплык акцияларында, регионаллык, савлайроссиялык ярысларында ортакшылык этип келедилер. Буьгуьнлерде мен ис коллективимди оьз ара анълавлы, тыпак, татым деп айтпага боламан, – дейди оьз хабарлавында боьлик етекшиси Альбина Ебраиловна оьз суьйген ис аьрекети, ис йолдаслары акында.
Яс етекши оьз алдына салынган кайсы ис борышларын да йигерли, каныгыслы толтырмага шалысады. Оьз исин пайдалы уйгынлавда, кайсы маьселеди де тешкеруьвли шешуьвде, ис коллективине кайзаманда да демевлик этип келуьвде куьшин аямайды. Сол зат талаплы етекшиге алдына салынган мыратларын яшавга енъил айландырмага амал береди.
Яс етекшидинъ суьйген исине яратувшылык пан каравы оьз етекшилеви мен эм биргелес куллык этетаган йогары организациялары ман тийисли бааланып келеди. Онынъ йогары кеспилик етисуьвлери коьп кере Сый грамоталары эм дипломлары ман белгиленгенлер.
– Буьгуьнлерде бизим яшавды социаллык куллыкшысыз коьз алдына аькелуьв бек кыйын. Бизим исимиз – ол яшав куванышы. Аьдемлерге кыйын болса, оларга бизим ярдамымыз керексе, биз дайым олардынъ касында болмага шалысамыз. Белки, аьдемлер уьшин коьп эм оьзинъ уьшин бир аз яшамага да керектир, деп те ойлайсынъ, – дейди боьлик етекшиси Альбина Агисова.
Баьри социаллык куллыкшыларын да оьткен Социаллык куллыкшысынынъ байрамы ман ак юректен кутлаймыз. Сиз этетаган исинъиз бен аьдемлерге йылувлык, сенимлик эм наьсип савкатлайсыз. Сизге эм сизинъ ювыкларынъызга берк ден савлык, онъайлык, етимисли исти йораймыз.
Г.Нурдинова.
Суьвретте: А.Агисова.
