Оьткен юмадынъ юма сонъгы куьни узак службасыннан сонъ аталары, аданаслары, куьевлери, увыллары кайткан Кизлярдынъ коьплеген аьеллерине суьйинишке айланды. Украинада оьтетаган Россия спецоперацияда ортакшылык этип, службасын тийисли юриткен 5389-ншы аьскер боьлигининъ аьскершилерин карсы алмага колларында гуьл байламлары, шарлар эм Россия ман Дагестан байраклары ман ювыклары дослары эм кала яшавшылары юреклери телезип, уьйкен оьктемлик пен йолыкпага алдыга шыктылар.
Суьйикли эм аявлы аьдемлер мен йолыгысув эм кушакласувлар каты болган аьдемлерди де коьзясларга толтырмай болмады. Неге десе олар оьзлерининъ аьскер борышын толтырып, уьйлерине аман эсен кайттылар. Оларды йолыкканлардынъ аьр кимине де соннан артык зат керек тувыл. Олар аман эсен уьйлерине кайтканлар!
Кизляр кала Аькимбасы коьрсеткен йигитлиги, аьскершилер алдына салынган борышты яваплы толтырганлары уьшин эм сондай кизляршылар оьз Элининъ шынты, оьктемли эм алал увыллары болып, уьлгиге тийисли экенин белгиледи эм оларга уьйкен разылыгын билдирди.
– Аьскершилик боьлигининъ етекшилеви сизди эр борышынъызды толтырмага оьз увылларындай этип йолга салган эди. Сиз аьскер атын тийисли юриттинъиз эм буьгуьнлерде де соны бардырасыз! Сизге коьп савбол айтамыз! Сизи мен оьктемсиймиз! Сизинъ баьри командировкаларынъыз да мундай толы тизиминде уьйге кайтканынъыз бан тамамлансынлар!», – деди ол. Ердеслерин Кизляр районынынъ аькимбасы Аким Микиров, Кизляр, Южно-Сухокумск, Кизляр районынынъ военный комиссары Рамазан Курмагомедов, Кизляр районы бойынша Россия ОМВД етекшисининъ орынбасары Амирбег Джабраилов эм сондай баскалар йылы хош алдылар, баьрисине де берк ден савлык, оьз Аталыгынынъ дайым шынты увыллары болып калганын йорадылар. Аьскершилерди аьдет бойынша тувган еринде оьтпек эм туз бан, биювлер мен йолыктылар, аналардынъ бириси аяк кийимин де таслап, Россия байрагын да коьтерип бийимеге ортага шыкты. Биринши номерли балалар уьшин саният мектебининъ тербияланувшылары, «Ритмы гор» деген биюв коллективи эм сондай баскалар байрамды оьз яратувшылыгы ман ярасыкладылар. 5389-ншы аьскер боьлик етекшисининъ орынбасары подполковник Амир Чубанов аьскершилерди йылы йолыкканы уьшин баьрисине де уьйкен разылыгын билдирди. Балалары, ювыклары оьз кушагыннан йибермеге суьймеген аьскершилер оьз уьйине тез болып кайтпага, хинкал, борщ уьй асларынынъ даьмин татпага, келеек командировкадан алдын тыншайып ял алып уьлгирмеге асыктылар, неге десе Элимизге оьз йигитлерининъ ярдамы эм коршалаганы керек.
Суьвретте: аьскершилерди йолыгув мезгили.
