Янъыларда Ногай район администрациясында муниципалитет етекшисининъ орынбасары Баймагомед Ярлыкаповтынъ басшылыгы ман, «Биз бирге» республикалык акциясын яклап, Россия япсарларын явдан коршалайтаган аьскершилердинъ эм согыс спецоперациясында катнасувга оьз эрки мен кеткенлердинъ аьеллерине коьмек этуьв район Штабынынъ кенъеси озгарылды. Онда йогарыда белгиленген штаб ваькиллери, ямагат организациялар ортакшылык эттилер.
Б.Ярлыкаповтынъ айтувы ман, согыс спецоперациясында аьскерлик борышын толтырып юрген эр йигитлеримиздинъ аьеллериннен коьмек тилеп уьш аьризе туьсти. Айтпага, Нариман авылыннан агалы-инили Абдулбариевлердинъ анасы уьйшилигинде керек кайбир маьселелерин шешуьв уьшин материаллык яктан коьмек этпеге тилек салды. Ога коьмек эсабында 30 мынъ маьнет акшалай берилди. Терекли-Мектеб авылыннан мобилизованный Р.Саитовтынъ анасына техникалык алатлар, йылы кийимлер алувга коьмек этилген. Сондай тилеги мен аьризе туьсти кайбир Ленинаулыннан СВО-да ортакшылык этетаган эр йигити Ш.Койлубаевтинъ анасыннан да. Экевине де коьмек эсабында 20-сар мынъ маьнет акша берилген.
Б.Ярлыкапов Дагестаннынъ Яслар ислери бойынша министерствосыннан ялгыз яшайтаган эм авырыйтаган аналарга ярдамласувга волонтерларды беркитуьв акында хат келгенин билдирди, эм, онынъ айтувы ман, сол акта штаб ваькиллери мен карар кабыл этилинип, яшавга шыгарылувы Ногай районынынъ КЦСОН етекшилерине йиберилди.
Сонъ шыгып соьйлеген район Хатын-кызлар Советининъ председатели Асият Манкаева янъыларда белгиленген Ана куьни алдында эм сол байрам куьнинде район аькимбасы Джамалутдин Эсиргепов Россия япсарларын явдан коршалавга мобилизованный эм оьз эрки мен кеткен ясларымыздынъ аналарынынъ уьйлеринде болганын, сол куьн район орталыгында эм баска яшавшылар пунктларында бир неше шаралар озгарылганын белгиледи.
– Аьлиги заманга бизде йылы кийимлер, гигиена амаллары эм сондай баска затлар салынып 21 посылка бар. Керексингенлер бизге келип алмага болады. Яде болса, сизинъ разылыгынъыз бан биз 21 посылкаларды республикалык Хатын-кызлар Совети аркасы ман мобилизацияга кеткен ясларымыз уьшин, йылы кийимлер эм азык-туьлик тиелип, согыс спецоперациясы озаяткан ерге йиберуьвге аьзирленеяткан уьйкен фура коьлигине коспага боламыз, – деген соьзлерин каратты А.Манкаева йыйылганларга.
Белгилеп озайык, муннан алдын да кайбир аьеллерге материаллык ярдамы этилген, а согыс спецоперациясында эр борышын толтырувда ян берген бес ердеслеримиз аьеллерине район администрациясы 50 мынъ маьнеттен акшалай ярдамын тийгисткен.
Э.Кожаева,
бас редактор.
