Кизляр районынынъ Косякино авылында навруз айынынъ 26-ншы куьнинде Россия пограничниги Рабадан Магамаевтинъ эстелигине багысланып эм «Россия уьшин», «Бизикилер уьшин» деген («Zа Россию! Zа наших!») спецоперацияга демевлик этилип волейбол бойынша ашык турнири уйгынланып оьтти.

Шарада Бабаюрт, Кизилюрт, Хасавюрт, Цунтин, Кизляр районларыннан эм Махачкаладынъ Ленин районыннан 8 командалары ортакшылык эттилер. Турнирдинъ тамамында Кизляр районыннан команда биринши орынга эм Цунтин районыннан волейбол ойнавшылары экинши орынга тийисли этилдилер. Турнир енъуьвшилери Кизляр районынынъ эм Косякино авыл администрациялары атыннан Сый грамоталары ман, савгалар ман белгилендилер.
Шарадынъ шатлыклы ашылувында Кизляр районынынъ етекшиси Аким Микиров та ортакшылык этти. Район аькимбасынынъ белгилеви мен, базласувлар Украинада спецоперацияда катнасатаган аьскер катнасувшыларына эм аьскерши-интернационалисти, Йигитлик орденининъ иеси Рабадан Магамаевтинъ эстелигине багысланып озгарылады. Рабадан Магамаев Россия пограничниги, Косякино авылынынъ яшавшысы, Таджикистан Республикасында аьскершилик борышын толтырув бойынша 1993-нши йыл янын курман эткен. Баска болып, Микиров турнир муниципалитетлер ара аьрекет этуьвде, досласувда тийисли уьлги болаягы акында да белгиледи.
Шарадынъ барысында катнасувшылар аьскершилик борышын толтырувда ян берген оьз ердеслерин бир такыйка уьндемей турувы ман эскердилер.
Суьвретте: шарадан коьринис.