Россия аьвелги заманлардан алып оьзининъ эркли, кайсы явды да Тувган ериннен кувып болган увыллары ман данъклы. Россияда Аталык коршалавшыларын – оьз элининъ патриотларын мектебте окыган йылларыннан алып аьзирлейдилер. Аьел эм мектеб оьз Элин суьйип, онынъ онъайлы келеектегиси уьшин колыннан келген баьри затты этип, аьскер болса – Аталыкты коршалап. Тагы да аьскерде яс йигитлер кыйынлыклардан оьтип, эркликти, намысты баалап уьйренедилер. Айтылган баьри затка бизим ердесимиз Эдил Махмудов аьскерде шынты баа берип баслады. Окытувшыларынынъ айтувы ман, Эдил бала заманыннан алып, оьз соьзинде турып болган, алдына салган борышларына етисуьвге ымтылган танъ юрекли эм йигерли яс.
Эдил Махмудов Ногай районынынъ берекетли Куьнбатар авылында тувган. Ол район орталыгы Терекли-Мектебтеги А.Джанибеков атындагы мектебинде окыган. Бизим йигит бала заманыннан алып атларды суьйген, «конный спорт» акында мырат эткен. Сол мырады ногай ясты Москвадагы патшалык ипподромындагы техникумга аькелген. Элимиздинъ бас каласында Эдил окып та, ислеп те уьлгирген. Ол тувып-оьскен Ногай шоьлде аргамаклар эркин юрген, байрамларда атшабыслар озгарылган. Алдын бизде болса, йигитлер ат уьстине минип кыдырып билмесе, уятлы деп саналган. Бизим ердесимиз бурынгы яслардай болып, йигерли кепте аттынъ уьстинде олтырган. Туьрли ерлерде озгарылган атшабысларда, солардынъ сырасында Краснодар каласында озгарылганында да катнаскан.
Озган йылдынъ курал айында бизим ердесимиз Эл алдында эр борышын толтырмага кеткен. Аьли Эдил Махмудов Москва областинде аьскер аьрекетин бардырады. Эдилдинъ тукымында ога уьлги эм коьрим болганлар коьп. Онынъ уьйкен атайы Уллы Аталык согысында катнаскан, ога явды каты сокканы уьшин коьп савгалар тапшырылган. Атасы Артур – Сырт Кавказдагы урысларда катнаскан, атасынынъ агасы Камиль Махмудов коьп йыллар узагына Ногай районында Дагестан бойынша Россия ОМВД-сында яваплылык пан куллыгын бардырады. Оларга тийисли болар уьшин, Эдил аьскерде энъ де ийгилер сырасында болмага шалысады. Ол бас деп зенитно-ракетный полкында коьлик айдавшы аьрекетин бардырады. Сонъ танк полкына коьшириледи, онда ол МТ-12 расчет номерлерининъ эм савытынынъ командирининъ борышын толтырады.
Яс оьзин тек ийги яктан, берген борышларды яваплылык пан толтыратаган аьскерши этип коьрсетеди. Аьскер аьзирлигининъ программасын энъ де йогары белгиге билмеге шалысады. Аьскерде алган билимлерин кулланып болады. Оьз йолдасларына ярдамга келмеге дайым аьзир эм олар да Эдилге сый этедилер. Командирлер берген борышларды заманы ман, сапатлы толтырады. Сонынъ акында эм коьп баска мактав соьзлерин аьскер боьлигине келгенде, Эдилдинъ ата-анасына онынъ командири айтады. Артур ман Ралина ийги соьзлер эситип, увылы уьшин куванадылар эм оьктемсийдилер.
Бизим ердеслеримиз аьскер аьрекетин соьйтип, сыйы ман толтырадылар. Сол оьзек те, тек олардынъ ата-анасына эм ювыкларына тувыл, бизим баьримизге де уьйкен куьез.
Н.Кожаева.
Суьвретте: Эдил Махмудов.