Кизляр районынынъ администрациясында, район администрациясынынъ пресс-службасынынъ билдируьвине коьре, муниципалитет аькимбасынынъ орынбасары Мурад Багандовтынъ етекшилиги мен 2023-нши йылга язлык шакырувга аьзирлик коьруьв эм оны озгарылув соравлары бойынша кенъес уйгынланып оьтти. Мурад Багандов белгилегенлей, савлай Россия бойынша язлык шакырув кампаниясы коькек айынынъ 1-нши куьниннен алып шилле айынынъ 15-нши куьнине дейим оьтеек.
Шакырув комиссиядынъ агзаларында аьскерлик службасын ден савлыгы бойынша оьтпеге ярайтаган эм онынъ сырасына шакырувга тийисли болган гражданлардынъ саны бойынша ашык суьврет болмага керек. Сол сорав ман байланыста авыл аькимбасларына эм ВУС етекшилерине оьз ерлеринде яслар эм олардынъ аьел агзалары ман шакырув ман байланыслы шараларга военкоматка келмеге кереги бойынша билдируьв кампанияды белсенли юритпеге борыш салынды.
Баска болып аьскер сырасына шакырувдан босатылган эм закон негизи бойынша кесек заманга калган, муниципаллык район еринде яшамайтаган эм пропискасы да болмаган гражданларды аянлав ниетте аьр бир авыл еринде призывниклердинъ списогын тергемеге кереги айтылды. Кизляр район эм Южно-Сухокумск, Кизляр калаларынынъ военный комиссарынынъ куллыгын кесек заманга юритуьвши, Комиссия председателининъ орынбасары Рамазан Курамагомедов гражданларга повесткалар тапшырылув йорыгы акында эм сол затта авыл аькимбаслары эм ыхтыярды саклав органлары да оьз демевлигин этееклери акында анълатты. 2022-нши йылда куьзде оьткен шакырувдан бас алган гражданлары бойынша да айырым сорав коьтерилди. Кизляр военный комиссариатынынъ йыйылыс пунктына гражданларды аькелуьви, баска болып, йыйылыс пунктына келуьв уьшин оларга повестка берилуьви эм алдын службады оьтуьвден бас акашкан гражданларды аянлав исин уйгынлавын тергев бойынша токтас та алынды.
Аьскерлик службасына шакырылувыннан биле турып бас акашкан гражданларына 28.03.1998 №53-ФЗ «О воинской обязанности и военной службе» Федераллык законын бузганы уьшин уголовлык эм административлик яваплылыгына йолыктырылув ниетте тергев органларына личное делолары йиберилуьви бойынша куллыгы озгарылаяк.